തിരുവനന്തപുരം . എട്ടു വർഷത്തിനിടയിൽ അഞ്ചു തവണ വൈദ്യുതി നിരക്ക് വർധന, ഇത് ഉന്നത തലത്തിലെ കാര്യശേഷിയില്ലായ്മയാണെന്ന് ആക്ഷേപമുയര്‍ന്നു കഴിഞ്ഞു. വൈദ്യുതി വാങ്ങാനുള്ള ദീര്‍ഘകാല കരാര്‍ റദ്ദാക്കിയതും അണക്കെട്ടുകളിലെ ജലനിരപ്പ് കുറഞ്ഞതുമാണ് കെഎസ്ഇബിയുടെ അധികബാധ്യതയ്ക്ക് കാരണം എന്നാണ് വിദഗ്ധമതം.
സംസ്ഥാനത്തെ വൈദ്യുതിവിതരണ ശൃംഖലയ്ക്ക് തുരങ്കം വെയ്ക്കുന്ന തരത്തിൽ ദീർഘകാല കരാർ എന്തിനു
റദ്ദാക്കിയെന്ന ചോദ്യം വരും ദിവസങ്ങളിൽ ഉയരും.
2023 മേയ് 10 വരെ വൈദ്യുതി വകുപ്പിൽ എല്ലാം കൃത്യമായിരുന്നു.സംസ്ഥാനത്തെ വൈദ്യുതി ഉപയോഗത്തിൽ 30 ശതമാനം മാത്രമാണ് ആഭ്യന്തര ഉൽപ്പാദനം. ബാക്കിയുള്ള 70 ശതമാനം പുറത്തു നിന്നും
വാങ്ങുന്നതായിരുന്നു രീതി.ഇതിനായി 2015 മുതൽ 2040 വരെ മൂന്ന് കമ്പനികളുമായി
ദീർഘകാല കരാർ ഉണ്ടായിരുന്നു.യൂണിറ്റിന് നാലുരൂപ 26 പൈസയ്ക്ക് 465 മെഗാവാട്ട് വൈദ്യുതി എഴുവര്‍ഷമായി വാങ്ങിക്കൊണ്ടിരുന്നത് 2023 ൽ റദ്ദാക്കി. അക്കാലത്തു കൃത്യമായി പറഞ്ഞാൽ 2020-2021ൽ KSEB ക്ക് 900 കോടി രൂപയുടെ
പ്രവർത്തന ലാഭവുമുണ്ടായിരുന്നു. പിന്നാലെ യൂണിറ്റിന് 8 രൂപ മുതൽ 12 രൂപ വരെ ഈടാക്കിയുള്ള ഹൃസ്വ കാല കരാർ
നടപ്പിലാക്കി.ഇതോടെ സകലതും കീഴ്മേൽ മറിഞ്ഞു.കേരള ഇലക്ട്രിസിറ്റി ഓഫീസേഴ്സ്
കോൺഫെഡറേഷൻ ഇതന്നേ കണക്കുകൾ നിരത്തി പറഞ്ഞതാണ്.ഒടുവിൽ വിവാദമായപ്പോൾ മുഖ്യമന്ത്രി തന്നെ
ദീർഘകാല കരാർ തിരിച്ചു കൊണ്ടു വരണമെന്ന് റെഗുലേറ്ററി കമ്മീഷനോട്
ആവശ്യപ്പെടുമെന്ന് നിയമസഭയെ അറിയിച്ചു.
എന്നാൽ കമ്പനികൾ കോടതി കയറി ചെറിയ നിരക്കിൽ വൈദ്യുതി നൽകാനുള്ള ദീർഘകാല കരാറിൽ നിന്നും രക്ഷപെട്ടു.
ചോദ്യങ്ങൾ രണ്ടുണ്ട്. ഒന്ന്… കോടികൾ ലാഭമുണ്ടാക്കാൻ സ്വകാര്യ കമ്പനികൾക്ക് വേണ്ടിയാണോ ദീർഘകാല കരാർ ഉപേക്ഷിച്ചത്?
രണ്ട്…. ഹ്രസ്വകാല കരാർ കൊണ്ടു ലാഭമുണ്ടാക്കിയത് ആര്?
ഇതിനുള്ള ഉത്തരം എന്താണെങ്കിലും അധികഭാരം ചുമക്കേണ്ടി വരുന്നത് വൈദ്യുതി ഉപഭോക്താക്കളാണ്.മൾട്ടി ഇയർ താരിഫ്.
ഈ വർഷം യൂണിറ്റിന് 16 പൈസ.
അടുത്ത വർഷം 12 പൈസ.മൂന്ന് വർഷത്തിനിടയിൽ 28 പൈസയുടെ വർദ്ധനവ്.സാധാരണക്കാരന്റെ നടുവൊടിയും എന്നുറപ്പായി.
അതേസമയം വൈദ്യുത നിരക്ക് കുത്തനെ കൂട്ടിയതിൽ സംസ്ഥാന വ്യാപക പ്രതിഷേധത്തിന് ഒങ്ങുകയാണ് പ്രതിപക്ഷം. മണ്ഡലം കമ്മിറ്റികളെ നേതൃത്വത്തിൽ ഇന്ന് രാത്രിയിൽ പന്തം കൊളുത്തി പ്രകടനം നടത്താൻ നിർദ്ദേശം നൽകി. രാത്രി 7 മണിക്കാണ് ഇന്നത്തെ പ്രതിഷേധം. യുഡിഎഫ് എന്ന നിലയിലും പ്രതിഷേധ പരിപാടികൾ ആലോചിക്കുന്നുണ്ട്. നിരക്ക് വർധന നിലവിൽ വന്നതിന് പിന്നാലെ ഇന്നലെത്തന്നെ വിവിധ ഇടങ്ങളിൽ പ്രതിഷേധം സംഘടിപ്പിച്ചിരുന്നു. നിരക്ക് വർധനവിൽ കോൺഗ്രസ് ശക്തമായ പ്രതിഷേധം സംഘടിപ്പിക്കുമെന്ന് ഇന്നലെ തന്നെ കെ.പി.സി.സി അധ്യക്ഷൻ കെ സുധാകരൻ അറിയിച്ചിരുന്നു.
