മാന്നാര്‍ ജയന്തി വധക്കേസില്‍ ഭര്‍ത്താവിന് വധശിക്ഷ. ആലുംമൂട് ജങ്ഷന് തെക്ക് കുട്ടമ്പേരൂര്‍ താമരപ്പള്ളില്‍ വീട്ടില്‍ ജയന്തി(39)യെ കൊലപ്പെടുത്തിയതിനാണ് ഭര്‍ത്താവ് ജി കുട്ടികൃഷ്ണനെ(60) വധശിക്ഷയ്ക്ക് വിധിച്ചത്. മാവേലിക്കര അഡീഷനല്‍ ജില്ലാ സെഷന്‍സ് കോടതി (ഒന്ന്) ജഡ്ജി വി ജി ശ്രീദേവിയാണു ശിക്ഷ വിധിച്ചത്.
2004 ഏപ്രില്‍ രണ്ടിനാണ് മാന്നാറിനെ നടുക്കിയ സംഭവം നടന്നത്. കുട്ടികൃഷ്ണനും ഭാര്യ ജയന്തിയും തമ്മില്‍ പകല്‍ താമരപ്പള്ളില്‍ വീട്ടില്‍ വച്ച് വഴക്കുണ്ടായി. ജയന്തിയെ ഭിത്തിയില്‍ ഇടിപ്പിച്ചു ബോധംകെടുത്തി ചുറ്റിക ഉപയോഗിച്ച് തലയ്ക്ക് അടിച്ചാണ് കൊലപ്പെടുത്തിയത്. പിന്നീട് കഴുത്ത് അറുത്തെടുത്ത് തറയില്‍വച്ചു. പിറ്റേന്ന് രാവിലെ പൊലീസില്‍ കീഴടങ്ങുകയായിരുന്നു. സംശയത്തെ തുടര്‍ന്നുള്ള വൈരാഗ്യമായിരുന്നു കൊലപ്പെടുത്താന്‍ കാരണം. ഒന്നര വയസ്സുള്ള മകളുടെ കണ്‍മുന്നില്‍വെച്ചാണ് പ്രതി ക്രൂര കൊലപാതകം നടത്തിയത്.
പൊലീസ് അറസ്റ്റ് ചെയ്ത് റിമാന്‍ഡില്‍ കഴിഞ്ഞ കുട്ടികൃഷ്ണന്‍ ജാമ്യത്തിലിറങ്ങിയ ശേഷം മാവേലിക്കര അഡീഷണല്‍ ജില്ലാ സെഷന്‍സ് കോടതി ഒന്നില്‍ വിസ്താര നടപടികള്‍ക്കായി കേസ് അവധിക്കുവച്ച സമയം ഒളിവില്‍ പോകുകയായിരുന്നു. ഒളിവില്‍ പോയ കുട്ടികൃഷ്ണനെ പിടികൂടാനായി നിരവധി തവണ പൊലീസ് അന്വേഷണം നടത്തിയെങ്കിലും കണ്ടെത്താന്‍ കഴിഞ്ഞില്ല. ഒളിവില്‍ പോയി 14 വര്‍ഷമായ കേസില്‍ പ്രതിയെ പിടികൂടികൂടുന്നതിനായി 2023 ജൂണില്‍ ജില്ലാ പൊലീസ് മേധാവി ചൈത്ര തെരേസ ജോണ്‍, ചെങ്ങന്നൂര്‍ ഡിവൈഎസ്പി എം കെ ബിനുകുമാര്‍, മാന്നാര്‍ എസ് എച്ച് ഒ ജോസ് മാത്യു എസ്‌ഐസിഎസ് അഭിരാം,സീനിയര്‍ സിവില്‍ പൊലീസ് ഓഫീസര്‍മാരായ ഉണ്ണികൃഷ്ണപിള്ള, മുഹമ്മദ് ഷഫീക്ക്, അരുണ്‍ ഭാസ്‌ക്കര്‍ എന്നിവരെ ഉള്‍പ്പെടുത്തി പ്രത്യേക അന്വേഷണസംഘം രൂപീകരിച്ച് അന്വേഷണം തുടങ്ങിയിരുന്നു. തുടര്‍ന്ന് 19 വര്‍ഷങ്ങള്‍ക്ക് ശേഷം 2023 ഒക്ടോബറില്‍ കളമശേരിയില്‍ നിന്നുമാണ് പ്രതിയെ അന്വേഷണ സംഘം കസ്റ്റഡിയിലെടുത്തത്. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടര്‍ പി വി സന്തോഷ്‌കുമാര്‍ ഹാജരായി.
