കണ്ണൂർ. മാടായി കോളേജിലെ നിയമന വിവാദത്തിൽ പ്രശ്നപരിഹാരത്തിന് കെപിസിസി നിയോഗിച്ച പ്രത്യേക സമിതി തെളിവെടുപ്പ് ആരംഭിച്ചു. ഇരു വിഭാഗം നേതാക്കളുമായി സമിതി അംഗങ്ങൾ ചർച്ച നടത്തി. പരസ്യ പ്രതിഷേധങ്ങളും പ്രസ്താവനകളും അവസാനിപ്പിക്കാൻ നിർദ്ദേശം നൽകി. പ്രശ്നം രമ്യമായി പരിഹരിക്കുമെന്ന് സമിതി അധ്യക്ഷൻ തിരുവഞ്ചൂർ രാധാകൃഷ്ണൻ പ്രതികരിച്ചു.
കോൺഗ്രസ് നിയന്ത്രണത്തിലുള്ള മാടായി കോളേജിൽ കോഴ വാങ്ങി രണ്ട് സിപിഐഎമ്മുകാർക്ക് നിയമനം നൽകിയെന്നാണ് വിമത വിഭാഗം കോൺഗ്രസ് പ്രവർത്തകരുടെ ആരോപണം. കോളേജ് ഭരണസമിതി ചെയർമാനായ എം കെ രാഘവൻ എംപിക്കെതിരെ പ്രാദേശിക കോൺഗ്രസ് പ്രവർത്തകർ തിരുവിലിറങ്ങിയിരുന്നു. തർക്കം തമ്മിൽ തല്ലുന്നതിലേക്ക് വഴി മാറിയതോടെയാണ് പ്രശ്നം തണുപ്പിക്കാനുള്ള കെപിസിസി നീക്കം. തിരുവഞ്ചൂർ രാധാകൃഷ്ണൻ അധ്യക്ഷനായ മൂന്നംഗ സമിതിയിൽ കെ. ജയന്ത്, അബ്ദുൾ മുത്തലിബ് എന്നിവരാണ് അംഗങ്ങൾ. കണ്ണൂരിലെത്തിയ സമിതി അംഗങ്ങൾ. ഇരുവിഭാഗം നേതാക്കളെയും ഡിസിസി ഓഫീസിലേക്ക് വിളിച്ചുവരുത്തി വെവ്വേറെ ചർച്ച നടത്തി. കോളേജിൽ നിയമനം ലഭിച്ച സിപിഐഎം പ്രവർത്തകൻ ധനേഷനിൽ നിന്ന് ഭരണസമിതി രാജി എഴുതി വാങ്ങണമെന്നാണ് വിമതവിഭാഗത്തിന്റെ ആവശ്യം. കോളേജ് ഭരണസമിതി അംഗങ്ങളെ പാർട്ടിയിൽ നിന്ന് സസ്പെൻഡ് ചെയ്ത, ഡിസിസി പ്രസിഡന്റിന്റെ നടപടിക്കെതിരായ അമർഷം രാഘവനെ അനുകൂലിക്കുന്ന വിഭാഗം സമിതിയെ അറിയിച്ചു. പ്രശ്നം പരിഹരിക്കുമെന്നും പരസ്യ പ്രതിഷേധങ്ങളും പ്രസ്താവനങ്ങളും അവസാനിപ്പിക്കണമെന്നും ഇരുവിഭാഗങ്ങൾക്കും സമിതി നിർദേശം നൽകി.
ഡിസിസി പ്രസിഡന്റ് മാർട്ടിൻ ജോർജ്, കെപിസിസി ജനറൽ സെക്രട്ടറി സോണി സെബാസ്റ്റ്യൻ എന്നിവരുമായും മൂന്നംഗ സമിതി ചർച്ച നടത്തി. എം കെ രാഘവൻ എം പിയുമായും കൂടിക്കാഴ്ച നടത്തും. ഒരാഴ്ചക്കുള്ളിൽ കെ പി സി സി ക്ക് റിപ്പോർട്ട്‌ കൈമാറാനാണ് നീക്കം.
