മലപ്പുറം.എസ് ഒ ജി കമാൻഡോ വിനീതിന്റെ ആത്മഹത്യയ്ക്ക് പിന്നിൽ അരീക്കോട് ക്യാമ്പിലെ അസിസ്റ്റൻറ് കമാൻഡൻ്റ് അജിത്താണെന്ന ആരോപണവുമായി കുടുംബം. അജിത്തിനെ മാറ്റി നിർത്തി വിശദമായ അന്വേഷണം നടത്തണമെന്നും ബന്ധുക്കൾ ആവശ്യപ്പെട്ടു. അജിത്തിന്റെ വ്യക്തിവിരോധമാണ് വിനീതിനെ ആത്മഹത്യയിലേക്ക് നയിച്ചതെന്ന് കമാൻഡോ സംഘം പ്രത്യേക അന്വേഷണ സംഘത്തിന് മൊഴി നൽകി.
കടുത്ത മാനസിക പീഡനം എസ് ഒ ജി ക്യാമ്പിലെ കമാൻഡോ ആയിരുന്ന വിനീത് അനുഭവിച്ചിരുന്നു എന്ന് സാക്ഷ്യപ്പെടുത്തുന്ന മൊഴികളാണ് അന്വേഷണസംഘത്തിന് ലഭിച്ചിരിക്കുന്നത്. 2021ൽ വിനീതിന്റെ സുഹൃത്ത് സുനീഷ് എസ്. ഒ. ജി ക്യാമ്പ് ട്രെയിനിങ്ങിനിടെ കുഴഞ്ഞു വീഴിരുന്നു. കൃത്യസമയത്ത് എസി അജിത്ത് ഉൾപ്പെടെയുള്ളവർ ചികിത്സ സൗകര്യം ഒരുക്കാത്തത് കൊണ്ട് സുനീഷ് മരണപ്പെട്ടു. ഇത് പിന്നീട് നടന്ന യോഗത്തിൽ വിനീത് ചോദ്യം ചെയ്തു. ഇതോടെ അജിത്തിന്റെ കണ്ണിലെ കരടായി വിനീത് മാറിയെന്നും പലപ്പോഴായി വ്യക്തിവിരോധം തീർത്തുവെന്നും 9 സഹപ്രവർത്തകർ കേസ് അന്വേഷിക്കുന്ന കൊണ്ടോട്ടി ഡിവൈഎസ്പിക്ക് മുൻപാകെ മൊഴി നൽകിയതായാണ് വിവരം. വിനീതിന്റെ കുടുംബവും എ സി അജിത്തിനെതിരെ രംഗത്തുവന്നു. അവധി പോലും കൊടുക്കാതെ പീഡിപ്പിച്ചുവെന്ന് ബന്ധുക്കൾ.
ക്യാമ്പുകളിൽ കഠിനമായ പരിശീലനത്തിന് ഇരയാകേണ്ടിവന്നു, നവംബറിലെ റീഫ്രഷ്മെന്റ് കോഴ്സിൽ പരാജയപ്പെട്ടപ്പോൾ എസ് ഒ ജി ക്യാമ്പ് വൃത്തിയാക്കുന്ന ജോലിയാണ് ഏൽപ്പിച്ചത്. ഇതെല്ലാം ചെയ്തിട്ടും ലീവ് നൽകിയില്ല. ഇതോടെ കടുത്ത മാനസിക വിഷമത്തിൽ ആയെന്നും സഹപ്രവർത്തകരുടെ മൊഴിയിൽ പറയുന്നുണ്ട്. ആരോപണ വിധേയനായ എസി അജിത്തിനെ മാറ്റിനിർത്തി കേസ് അന്വേഷിക്കണമെന്ന ആവശ്യമാണ് ഉയരുന്നത് .
