തൃശൂര്‍. കാലിക്കറ്റ് സർവകലാശാല ഡിസോൺ കലോത്സവത്തിന് മാള ഹോളി ഗ്രെയ്സ് കോളേജിൽ ഉണ്ടായ എസ്എഫ്ഐ കെഎസ്‌യു – സംഘർഷത്തിൽ കാലിക്കറ്റ് സർവകലാശാലയിലെ മുഴുവൻ ക്യാമ്പസുകളിലും നാളെ പഠിപ്പ് മുടക്ക് പ്രഖ്യാപിച്ച് എസ്എഫ്ഐ. സംഘാടന വീഴ്ച ചോദ്യം ചെയ്തപ്പോൾ ഏകപക്ഷീയമായ ആക്രമണമാണ് നടത്തിയത് എന്ന് എസ്എഫ്ഐ സംസ്ഥാന സെക്രട്ടറി പി എം ആർഷോ വ്യക്തമാക്കി. അതേസമയം ആക്രമങ്ങൾ അഴിച്ചുവിട്ട എസ്എഫ്ഐക്ക് നേരെ ഉയർത്തിയ പ്രതിരോധം മാത്രമാണ് സംഘർഷം എന്ന് കെ എസ് യു വും വ്യക്തമാക്കി. കെഎസ്‌യു പ്രവർത്തകർ സഞ്ചരിച്ച ആംബുലൻസിന് നേരെ ഉണ്ടായ ആക്രമണത്തിൽ കൊരട്ടി പോലീസ് ഡ്രൈവറുടെ പരാതിയിൽ കേസെടുത്തു.
സ്കിറ്റ് മത്സരത്തിലെ വിധി നിർണയത്തിന് ശേഷമായിരുന്നു എസ്എഫ്ഐ കെഎസ്‌യു സംഘർഷം . മത്സരത്തിൽ ശ്രീ കേരളവർമ്മ കോളേജിന് അർഹിച്ച സ്ഥാനം ലഭിച്ചില്ലെന്ന് ചൂണ്ടിക്കാട്ടി വിദ്യാർത്ഥികൾ സംഘാടകരുമായി വാക്കു തർക്കത്തിൽ ആയി . പിന്നാലെയാണ് വിദ്യാർത്ഥി സംഘടനകൾ തമ്മിലുള്ള സംഘർഷം. കമ്പി വടിയും കല്ലുകളും ഉപയോഗിച്ച് നടത്തിയ സംഘർഷത്തിൽ നിരവധി പേർക്ക് പരിക്കേറ്റു . ആക്രമണത്തിൽ ഗുരുതരമായി പരിക്കേറ്റ എസ്എഫ്ഐ യൂണിറ്റ് സെക്രട്ടറി ആശിഷ് തൃശ്ശൂർ മെഡിക്കൽ കോളേജിൽ ചികിത്സയിൽ തുടരുകയാണ്. ഗുരുതരമായ സംഘാടക വീഴ്ചയാണ് സർവകലാശാല കലോത്സവത്തിൽ ഉണ്ടായതെന്നും കെഎസ്‌യു നടത്തിയത് ഏകപക്ഷീയമായ ആക്രമണമെന്നും എസ്എഫ്ഐ സംസ്ഥാന സെക്രട്ടറി പി എം ആർഷോ ആരോപിച്ചു.
എല്ലാ പ്രശ്നങ്ങൾക്കും കാരണക്കാർ എസ്എഫ്ഐ ആണെന്നും , എസ്എഫ്ഐ അഴിച്ചുവിട്ട ആക്രമണങ്ങൾ പ്രതിരോധിക്കുക മാത്രമാണ് ചെയ്തെന്നുംകെ.എസ്.യു സംസ്ഥാന പ്രസിഡന്റ് അലോഷ്യസ് സേവിയർ വ്യക്തമാക്കി . എസ്എഫ്ഐ ഭാരവാഹികൾ നിർദ്ദേശിച്ച അജണ്ടയാണ് പ്രവർത്തകർ നടപ്പിലാക്കിയതെന്ന് കാലിക്കറ്റ് സർവകലാശാല യൂണിയൻ ചെയർപേഴ്സൺ നിതിൻ ഫാത്തിമ പറഞ്ഞു.
അതേസമയം പരിക്കേറ്റ കെ എസ് യു പ്രവർത്തകർ സഞ്ചരിച്ച ആംബുലൻസിന് നേരെ ഉണ്ടായ ആക്രമണത്തിൽ ഡ്രൈവർ വൈഭവിന്റെ പരാതിയിൽ കൊരട്ടി പോലീസ് കേസെടുത്തു. ആംബുലൻസ് ആക്രമണത്തിന്റെ സിസിടിവി ദൃശ്യങ്ങളും പുറത്തുവന്നു .
തങ്ങളുടെ വനിതാ പ്രവർത്തകരെ ആക്രമിച്ചെന്ന് കെഎസ്‌യു വും എസ്എഫ്ഐയും പരസ്പരം പഴിചാരിയിട്ടുണ്ട്. ഡിവൈഎസ്പിയുടെ നേതൃത്വത്തിലുള്ള പോലീസ് സംഘം സ്ഥലത്തെത്തിയാണ് മണിക്കൂറുകൾ നീണ്ട സംഘട്ടനം അവസാനിപ്പിച്ചത് . പരിക്കേറ്റവരുടെ മൊഴിയും സിസിടിവി ദൃശ്യങ്ങൾ കേന്ദ്രീകരിച്ച സമഗ്രമായ അന്വേഷണത്തിലേക്ക് പോലീസ് കടന്നിട്ടുണ്ട്.
