എറണാകുളം പെരുമ്പാവൂരിൽ പിതാവിനെ കൊലപ്പെടുത്തി മകൻ . തെക്കേതല വീട്ടിൽ മെൽജോയെയാണ് പെരുമ്പാവൂർ പൊലീസ് അറസ്റ്റ് ചെയ്തത്.
പെരുമ്പാവൂരിൽ മദ്യലഹരിയിൽ പിതാവിനെ ചവിട്ടിക്കൊല്ലുകയായിരുന്നു. ചേലാമറ്റം നാല് സെന്റ് കോളനിയിൽ തെക്കുംതല വീട്ടിൽ ജോണി 67 ആണ് മരിച്ചത്. സംഭവത്തിൽ ജോണിയുടെ മകൻ മെൽജോയെയാണ് പെരുമ്പാവൂർ പോലീസ് അറസ്റ്റ് ചെയ്തത്.
ടി ബി രോഗബാധിതനായി കുറച്ചുനാളുകളായി കിടപ്പിലായിരുന്നു മരണമടഞ്ഞ ജോണി. ബുധനാഴ്ച രാത്രി ഒമ്പതരയോടെ പിതാവിന് അനക്കമില്ലെന്ന് പറഞ്ഞ് മെൽജോ സഹോദരിയുടെ വീട്ടിലെത്തി. സഹോദരി എത്തി പിതാവിനെ പെരുമ്പാവൂർ താലൂക്ക് ആശുപത്രിയിൽ എത്തിച്ചുവെങ്കിലും നേരത്തെ മരണം സംഭവിച്ചിരുന്നതായി ഡോക്ടർമാർ പറഞ്ഞു. പിന്നീട് ഇന്ന് രാവിലെ മൂവാറ്റുപുഴ പോലീസ് സർജൻ പോസ്റ്റ്മോർട്ടം നടത്തിയപ്പോൾ ജോണിയുടെ രണ്ട് വാരിയെല്ലുകൾക്കും ഒടിവ് സംഭവിച്ചതായി കണ്ടെത്തി. തുടർന്ന് സംശയം തോന്നിയ പെരുമ്പാവൂർ പോലീസ് മെൽജോയെ കസ്റ്റഡിയിലെടുത്ത് ചോദ്യം ചെയ്തപ്പോളാണ് കൊലപാതകത്തിന്റെ ചുരുൾ അഴിഞ്ഞത്. മദ്യലഹരിയിൽ താൻ പിതാവിനെ ചവിട്ടിയതായി മേൽജോ പോലീസിനോട് സമ്മതിച്ചു. മാതാവിനെയും ആക്രമിച്ചിരുന്നു. പ്രതിയെ നാളെ കോടതിയിൽ ഹാജരാക്കും
