കൊല്ലം: അമിത വേഗതയിൽ ആട്ടോറിക്ഷ ബൈക്കിനെ മറികടന്നത് കണ്ട് രൂക്ഷമായി നോക്കിയ ബൈക്ക് യാത്രികനായ യുവാവിനെ ആക്രമിച്ച് കൊലപ്പെടുത്താൻ ശ്രമിച്ച ആട്ടോ ഡ്രൈവറെ കൊല്ലം വെസ്റ്റ് പോലീസ് പിടികൂടി. മൂതക്കര സെറ്റിൽമെൻറ് കോളനി സ്നേഹ നഗർ 103 ലെ മരിയാർ റോജർ (27) ആണ് പോലീസ് പിടിയിലായത്.
നീലാംതോട്ടം ഓടപ്പുറം റോഡിലൂടെ ബൈക്കിൽ വന്ന യുവാവാണ് ആക്രമിക്കപ്പെട്ടത്. അമിത വേഗതയിൽ എതിരെ വന്ന ആട്ടോ റിക്ഷ ബൈക്കിനെ ഇടിക്കാൻ വന്നപ്പോൾ വെട്ടിച്ച് മാറ്റി ആട്ടോ ഡ്രൈവറെ നോക്കിയ യുവാവിനെ ആട്ടോറിക്ഷാ നിർത്തി ഡ്രൈവർ ആക്രമിക്കുകയായിരുന്നു. ഇയാളുടെ അമിതവേഗത യുവാവ് ചോദ്യം ചെയ്തപ്പോൾ അസഭ്യം വിളിച്ച് കൊണ്ട് ആട്ടോയിൽ സൂക്ഷിച്ചിരുന്ന ഇരുമ്പ് കമ്പി എടുത്ത് യുവാവിൻറെ തലയ്ക്ക് അടിച്ച് കൊലപ്പെടുത്താൻ ശ്രമിക്കുകയായിരുന്നു.
പരിക്കേറ്റ യുവാവ് കൊല്ലത്തെ സ്വകാര്യ ആശുപത്രിയിൽ ചികിത്സ തേടി. യുവാവിൻറെ പരാതിയിൽ ആട്ടോ ഡ്രൈവറെ മൂതക്കര നിന്നും പളളിത്തോട്ടം പോലീസിൻറെ സഹായത്തോടെ കൊല്ലം വെസ്റ്റ് പോലീസ് പിടികൂടി. കൊല്ലം വെസ്റ്റ് ഇൻസ്പെക്ടർ ബി. ഷെഫീക്കിൻറെ നേതൃത്വത്തിൽ എസ്സ്.ഐ മാരായ ശ്യാംകുമാർ, ഹസൻകുഞ്ഞ് എ.എസ്.ഐ ഉണ്ണികൃഷ്ണൻ, എസ്.സി.പി.ഒ മാരായ അബുതാഹീർ, ബിനു സി.പി.ഒ മാരായ ഷാഫി, പ്രമോദ് എന്നിവരടങ്ങിയ സംഘമാണ് ഇയാളെ പിടികൂടിയത്. ഇയാളെ റിമാൻറ് ചെയ്തു.
