ആലപ്പുഴ: അഞ്ച് മണിക്കൂർ കായൽ പരപ്പിലൂടെ ബോട്ടിൽ കറങ്ങാൻ സൗകര്യം ഒരുക്കുകയാണ് സംസ്ഥാന ജല ഗതാഗത വകുപ്പിന്റെ ‘വേഗ – 2’. 2020 ഡിസംബറിൽ സർവീസ് ആരംഭിച്ച ബോട്ടിന് ഇപ്പോൾ സഞ്ചാരികൾക്കിടയിൽ വലിയ സ്വീകാര്യതയാണ് ലഭിച്ച്‌ വരുന്നത്.
സാധാരണ സർക്കാർ ബോട്ടുകളിൽ നിന്ന് വ്യത്യസ്തമായി ബോട്ടിന്റെ മുൻ ഭാഗത്ത് നിന്ന് കുട്ടനാടിന്റെ കായൽ സൗന്ദര്യം ആസ്വദിക്കാനും വേഗ – 2 യിൽ സൗകര്യമുണ്ട്.
സർക്കാരിന്റെ കീഴിലുള്ള ഈ ബോട്ട് ദിവസവും 11.30 ന് ആലപ്പുഴയിൽ നിന്നാണ് യാത്ര തിരിക്കുന്നത്. പുന്നമടക്കായലിലൂടെയും, വേമ്ബനാട് കായലിലൂടെയുമാണ് സഞ്ചാരം. മുഹമ്മ, റാണി, ചിത്തിര, മാർത്താണ്ഡം, ആർ ബ്ലോക്ക്‌, മംഗലശ്ശേരി, കുപ്പപ്പുറം വഴി തിരികെ 4.30 ന് ആലപ്പുഴയിലെത്തും. പക്ഷി നിരീക്ഷകരുടെ പറുദീസയായ പാതിരാമണൽ ദ്വീപിൽ ഇറങ്ങി കാഴ്ചകൾ കാണാനും വേഗ – 2 സൗകര്യമൊരുക്കുന്നുണ്ട്.
മലയാളി കുടുംബങ്ങളാണ് സഞ്ചാരികളിൽ കൂടുതലുമെന്ന് ജല ഗതാഗതവകുപ്പ് ഉദ്യോഗസ്ഥർ പറയുന്നു. കോവിഡ് നിയന്ത്രണങ്ങൾ ഒഴിഞ്ഞതോടെ വിദേശികളും എത്തുന്നുണ്ട്. വെക്കേഷൻ തുടങ്ങിയപ്പോൾ സീറ്റുകൾ മുഴുവൻ വളരെ വേഗം ബുക്കായി പോകുന്ന അവസ്ഥയുണ്ടെന്നും ഉദ്യോഗസ്ഥർ പറഞ്ഞു.
നോൺ എ സി യിൽ യാത്ര ചെയ്യാൻ 400 രൂപയും, എ സി യിൽ 600 രൂപയുമാണ് ടിക്കറ്റ് നിരക്ക്. 100 രൂപ കൂടി കൊടുത്താൽ കുടുംബശ്രീ ഒരുക്കുന്ന നല്ല നാടൻ ഭക്ഷണവും കഴിച്ച്‌ പോരാം. മണിക്കൂറിൽ 25 കിലോമീറ്റർ ആണ് ബോട്ടിന്റെ വേഗം. 120 പേർക്ക് യാത്ര ചെയ്യാം. 40 എ സി സീറ്റും 80 നോൺ എ സി സീറ്റുമുണ്ട്. ലൈഫ് ജാക്കറ്റുൾപ്പെടെയുള്ള സുരക്ഷാക്രമീകരണങ്ങളും ബോട്ടിൽ ഒരുക്കിയിട്ടുണ്ട്.
സീറ്റ് ബുക്ക് ചെയ്യാൻ…. 9400050322, 9400050325, 9400050327
