കൊച്ചി: സംസ്ഥാനത്തും രാജ്യത്തും കോവിഡ് കേസുകൾ കൂടുന്നത് ഏറെ ആശങ്കയാണ് സൃഷ്ടിക്കുന്നത്. പുതിയ തരംഗത്തിന്റെ മുന്നറിയിപ്പാണോ എന്ന ആശങ്കയാണ് പ്രധാനമായും ഉയരുന്നത്.
നാലാം തരംഗം ഉണ്ടാകുമോ നാലാം ഡോസ് വേണ്ടി വരുമോ എന്നൊക്കെയുള്ള ചോദ്യങ്ങളാണ് പ്രധാനമായും ഉയരുന്നത്. എന്നാൽ ശക്തിയേറിയ പുതിയ വകഭേദമുണ്ടായില്ലെങ്കിൽ നാലാം തരംഗം ഉണ്ടാകാനിടയില്ലെന്നാണ് ഈ രംഗത്തെ വിദഗ്ദ്ധർ വ്യക്തമാക്കുന്നത്. വാക്സിന്റെ നാലാം ഡോസ് ആവശ്യമായി വന്നേക്കാമെന്നും പ്രശസ്ത വൈറോളജിസ്റ്റും വെല്ലൂർ സിഎംസി വൈറോളജി വിഭാഗം മുൻ മേധാവിയുമായ ഡോ. ടി. ജേക്കബ് ജോൺ പറഞ്ഞു. ഈ ഘട്ടത്തിൽ കുട്ടികളാകും വൈറസ് വാഹകരാകുക എന്നും അദ്ദേഹം ചൂണ്ടിക്കാട്ടി.
രാജ്യത്തെ പ്രതിദിന കോവിഡ് ബാധിതരുടെ എണ്ണത്തിൽ 40% വർധനയാണ് ഉണ്ടായിട്ടുള്ളത്. കോവിഡ് വാക്സീന്റെ മൂന്നാം ഡോസുകളാണ് ഇപ്പോൾ നൽകുന്നത്. ഇപ്പോഴത്തെ പ്രതിരോധ പ്രവർത്തനങ്ങൾ ശരിയായ ദിശയിലാണെന്നും അദ്ദേഹം പറയുന്നു. അതേസമയം കോവിഡ് പൂർണമായും തുടച്ച് നീക്കാൻ എത്രകാലം എടുക്കുമെന്നതിനെക്കുറിച്ച് ഇപ്പോൾ പറയാനാകില്ലെന്നും അദ്ദേഹം വ്യക്തമാക്കി.
