കുന്നത്തൂർ: ഇരുചക്രവാഹനത്തിൽ പാത്രത്തിലാക്കി കൊണ്ടുവന്ന വെളിച്ചെണ്ണ വാഹനം മറിഞ്ഞതിനെ തുടർന്ന് റോഡിൽ ഒഴുകി.റോഡിന് നടുവിലൂടെ വെളിച്ചെണ്ണ ഒഴുകിയതോടെ നിരവധി ഇരുചക്രവാഹനങ്ങൾ തെന്നിമറിഞ്ഞു വീണു. ഇന്ന് വൈകിട്ട് 4.30ന് ശാസ്താംകോട്ട ഭരണിക്കാവ് ജംഗ്ഷനിൽ കടപുഴ റോഡിന്റെ തുടക്കത്തിലാണ് അപകടം നടന്നത്.സ്റ്റീൽ പാത്രത്തിലാക്കിയ എണ്ണ സ്കൂട്ടറിൽ കൊണ്ടുവരുന്നതിനിടെ എതിരെ വന്ന കാറിൽ തട്ടിയതിനെ തുടർന്ന് പാത്രം റോഡിലേക്ക് മറിയുകയും എണ്ണ റോഡിൽ വ്യാപിക്കുകയുമായിരുന്നു.റോഡിൽ ഒഴുകിയത് എണ്ണയാണന്ന് അറിയാതെ വാഹനം കയറ്റിയിറക്കിയതോടെ
ഇതുവഴി വന്ന സ്കൂട്ടർ യാത്രികർ ഒരോന്നായി തെന്നി മറിഞ്ഞു വീണു.പലരും വലിയ അപകടത്തിൽ നിന്നും ഭാഗ്യം കൊണ്ട് രക്ഷപ്പെടുകയായിരുന്നു.ശാസ്താംകോട്ടയിൽ നിന്നും ഫയർഫോഴ്സ് എത്തി വെള്ളം ശക്തിയായി റോഡിലേക്ക് ഒഴിച്ച് കഴുകിയതോടെയാണ് അപകടം ഒഴിവായത്.തിരക്കേറിയ ജംഗ്ഷനിൽ ഏറെ നേരം ഗതാഗത തടസവും ഉണ്ടായി.
