കൊല്ലം.സാമൂഹ്യ മാധ്യമത്തിലൂടെ പെണ്‍കുട്ടിയുമായുള്ള സ്വകാര്യ ദൃശ്യങ്ങള്‍ പ്രചരിപ്പിച്ച ആള്‍ പിടിയില്‍. നീരാവില്‍ വയലില്‍ പുത്തന്‍ വീട്ടില്‍ സുധി(27) ആണ് ശക്തികുളങ്ങര പോലീസിന്‍റെ പിടിയിലായത്.
പ്രായപൂര്‍ത്തിയാകാത്ത പെണ്‍കുട്ടിയുമായി മുമ്പ് പ്രണയത്തിലായിരുന്ന പ്രതി ഇവര്‍ തമ്മിലുള്ള സ്വകാര്യ ദൃശ്യങ്ങള്‍ ഫോണില്‍ സൂക്ഷിച്ചിരുന്നു. പെണ്‍കുട്ടി ഇയാളുമായുള്ള ബന്ധം അവസാനിപ്പിച്ചെങ്കിലും പ്രതി, ദൃശ്യങ്ങള്‍ ഫോണില്‍ നിന്നും നീക്കം ചെയ്യ്തിരുന്നില്ല. പെണ്‍കുട്ടി പ്രണയത്തില്‍ നിന്നും പിന്‍മാറിയ വിരോധത്തില്‍ പിന്നീട് പ്രതി ഇവര്‍ തമ്മിലുള്ള സ്വകാര്യ ദൃശ്യങ്ങള്‍ സാമൂഹ്യ മാധ്യമം വഴി പ്രചരിപ്പിക്കുകയായിരുന്നു.
തുടര്‍ന്ന് പെണ്‍കുട്ടി നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്യ്ത ശക്തികുളങ്ങര പോലീസ് നടത്തിയ അന്വേഷണത്തില്‍ പ്രതി ബാംഗ്ലൂരില്‍ ഉള്ളതായി കണ്ടെത്തിയിരുന്നു. ബാംഗ്ലൂരില്‍ ഒപ്റ്റീഷന്‍ ആയി ജോലി നോക്കി വന്ന പ്രതിയെ ശക്തികുളങ്ങര പോലീസ് ഇന്‍സ്പെക്ടര്‍ ബിനു വര്‍ഗ്ഗീസിന്‍റെ നിര്‍ദ്ദേശപ്രകാരം എസ്ഐ മാരായ ആശ, ഡാര്‍വ്വിന്‍, സിപിഒ മാരായ അബുതാഹിര്‍, ശ്രീകാന്ത് എന്നിവരങ്ങിയ സംഘം ബാംഗ്ലൂരില്‍ നിന്നും അറസ്റ്റ് ചെയ്യുകയായിരുന്നു.
