പാരിപ്പള്ളി . മുന്‍വിരോധത്താല്‍ യുവാവിനെ വെട്ടിക്കൊലപ്പെടുത്താന്‍ ശ്രമിച്ച പ്രതി പോലീസ് പിടിയിലായി. പുത്തന്‍കുളം കേശുഭവനില്‍ തമ്പിയെന്ന് വിളിക്കുന്ന സാജന്‍ (46) ആണ് പാരിപ്പള്ളി പോലീസിന്റെ പിടിയിലായത്. പ്രതി കഴിഞ്ഞ 18-ാം തീയതി ഉച്ചയ്ക്ക് 12 മണിക്ക് ഭജനമഠം ചരുവിള പുത്തന്‍വീട്ടില്‍ കയറി ആഹാരം കഴിക്കുകയായിരുന്ന പ്രമോദിനെ കൊടുവാള്‍ കൊണ്ട് ഇരുകൈകളിലും വെട്ടി ഗുരുതരമായി പരിക്കേല്‍പ്പിക്കുകയും തുടര്‍ന്ന് തറയില്‍ വീണ പ്രമോദിന്റെ ഷോള്‍ഡറിലും തലയിലും വെട്ടിക്കൊലപ്പെടുത്താന്‍ ശ്രമിക്കുകയുമായിരുന്നു.
ഗുരുതരമായി പരിക്കേറ്റ യുവാവ് ആശുപത്രിയില്‍ അത്യാസന വിഭാഗത്തില്‍ ചികില്‍സയിലാണ്. പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത പാരിപ്പള്ളി പോലീസ് പ്രതിയെ പിടികൂടുകയായിരുന്നു. പാരിപ്പള്ളി പോലീസ് സ്റ്റേഷന്‍ ഇന്‍സ്‌പെക്ടര്‍ അല്‍ജബറിന്റെ നേതൃത്വത്തില്‍ എസ്.ഐ മാരായ സുജിത്, രാധാകൃഷ്ണന്‍ സിപിഒ ബിജു, സജിത്‌ലാല്‍, അനൂപ് എന്നിവരടങ്ങിയ സംഘമാണ് പ്രതിളെ പിടികൂടിയത്.
