ചവറ.ബന്ധുവിന്‍റെ മരണാനന്തര ചടങ്ങിനെത്തിയ യുവാക്കളെ വെട്ടി കൊലപ്പെടുത്താന്‍ ശ്രമിച്ച അയല്‍വാസികളായ പ്രതികള്‍ പോലീസ് പിടിയിലായി. ചവറ, കൊട്ടുകാട്, തൈയ്യില്‍ കിഴക്കതില്‍ ഓമനക്കുട്ടന്‍(76), മക്കളായ അനില്‍കുമാര്‍(42), ബിനുകുമാര്‍(44) എന്നിവരാണ് ചവറ പോലീസിന്‍റെ പിടിയിലായത്.
കരുനാഗപ്പള്ളി സ്വദേശികളായ നാദിര്‍ഷാ , സാദിഖ് എന്നിവര്‍ക്കാണ് പരിക്കേറ്റത്. ബന്ധുവിന്‍റെ മരണാനന്തര ചടങ്ങിനെത്തിയ യുവാക്കള്‍ അയല്‍വാസിയായ ഓമനക്കുട്ടന്‍റെ വസ്തുവിലേക്ക് കയറി നിന്ന് ഫോണില്‍ സംസാരിച്ചതിനെ തുടര്‍ന്ന് ഉണ്ടായ തര്‍ക്കമാണ് അക്രമത്തിലേക്ക് നയിച്ചത്. പ്രകോപിതരായ പ്രതികള്‍ മാരകായുധങ്ങളുമായി എത്തി യുവാക്കളെ വെട്ടിക്കൊലപ്പെടുത്താന്‍ ശ്രമിക്കുകയായിരുന്നു.
ചവറ പോലീസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ പ്രതികളെ അറസ്റ്റ് ചെയ്യുകയായിരുന്നു. നെഞ്ചു വേദന അനുഭവപ്പെട്ടതിനെ തുടര്‍ന്ന് പ്രതിയായ ഓമനക്കുട്ടനെ തിരുവനന്തപുരം മെഡിക്കല്‍ കോളജില്‍ പ്രവേശിപ്പിച്ചിരുന്നു. ഇവര്‍ 2021 ലും സമാന കുറ്റകൃത്യത്തിന് ചവറ പോലീസ് രജിസ്റ്റര്‍ ചെയ്യ്തിട്ടുള്ള കേസില്‍ പ്രതികളാണ്. ചവറ പോലീസ് ഇന്‍സ്പെക്ടര്‍ കെ. ആര്‍ ബിജുവിന്‍റെ നേതൃത്വത്തിലുള്ള പോലീസ് സംഘമാണ് പ്രതികളെ അറസ്റ്റ് ചെയ്യ്തത്.
