കുണ്ടറ:യുവാവിനെ കാപ്പ ചുമത്തി അറസ്റ്റ് ചെയ്തു. പരയം പടപ്പക്കര റൊസാരിയം വീട്ടില്‍ അജീഷ് രാജന്‍ (ഫെബിന്‍ -22) ആണ്
കുണ്ടറ പോലീസിന്റെ പിടിയിലായത്. കുണ്ടറ പോലീസ് സ്റ്റേഷന്‍ പരിധിയില്‍ കഴിഞ്ഞ കുറെ കാലങ്ങളായി കൊലപാതകശ്രമം, കഠിന ദേഹോപദ്രവം, മാരകായുധങ്ങള്‍ ഉപയോഗിച്ച് ഭീകരാന്തരീക്ഷം സൃഷ്ടിക്കല്‍, സ്ത്രീകള്‍ക്കെതിരെയുള്ള അതിക്രമം, വീടുകയറിയുള്ള ആക്രമണം എന്നിങ്ങനെ നിരവധി കേസുകളില്‍ പ്രതിയാണ് പിടിയിലായ അജീഷ്. ശാസ്താംകോട്ട ഡിവൈഎസ്പി ഷെരീഫ്. എസിന്റെ നിര്‍ദ്ദേശ പ്രകാരം കുണ്ടറ സ്റ്റേഷന്‍ എസ്എച്ച്ഒ, ആര്‍. രതീഷിന്റെ നേതൃത്വത്തില്‍ എസ്‌ഐമാരായ അനീഷ് ബി, ബിമല്‍ഘോഷ്, സിപിഒമാരായ ദീപക്, സുനിലാല്‍, എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്.
കൊല്ലം: കരുനാഗപ്പള്ളി തൊടിയൂര്‍ പുലിയൂര്‍ വഞ്ചി പുത്തന്‍തറയില്‍ വീട്ടില്‍ ദിലീപ് ചന്ദ്രന്‍(ബോക്‌സര്‍-27), മീനാട് കാരംകോട് സനൂജ് മന്‍സിലില്‍ സനൂജ്(32) എന്നിവരെ കാപ്പ ചുമത്തി അറസ്റ്റ് ചെയ്തു. കരുനാഗപ്പള്ളി, ശാസ്താംകോട്ട എന്നീ പോലീസ് സ്റ്റേഷനുകളിലായി എട്ട് ക്രിമിനല്‍ കേസുകളില്‍ പ്രതിയാണ് ദിലീപ്. കരുനാഗപ്പള്ളി ഇന്‍സ്‌പെക്ടര്‍ ബിജുവിന്റെ നേതൃത്വത്തില്‍ എസ്‌ഐമാരായ ഷാജിമോന്‍, ബിജു, റസ്സല്‍ ജോര്‍ജ്ജ്, സിപിഒമാരായ ഹാഷിം, നൗഫജ്ജന്‍ എന്നിവരടങ്ങിയ സംഘമാണ് ഇയാളെ പിടികൂടിയത്.
സനൂജിന്റെ പേരില്‍ ചാത്തന്നൂര്‍ എക്‌സൈസ് റേഞ്ച് ഓഫീസ് പരിധിയിലും, ചാത്തന്നൂര്‍, പാരിപ്പള്ളി എന്നീ പോലീസ് സ്റ്റേഷന്‍ പരിധിയിലുമായി 13 ക്രിമിനല്‍ കേസുകളുണ്ട്. ചാത്തന്നൂര്‍ ഇന്‍സ്‌പെക്ടര്‍ ശിവകുമാറിന്റെ നേതൃത്വത്തിലുള്ള സംഘമാണ് ഇയാളെ പിടികൂടിയത്.
