കൊല്ലം.സീരിയലില്‍ അവസരം വാഗ്ദാനം ചെയ്ത് പീഡനം; പോക്സോ പ്രകാരം യുവാവ് പിടിയില്‍
സീരിയലില്‍ അവസരം വാഗ്ദാനം ചെയ്ത് പീഡിപ്പിച്ച യുവാവിനെ പോലീസ് പിടികൂടി.
പള്ളിത്തോട്ടം, മൂദാക്കര, ഇന്‍ഫന്‍റ് ജീസസ് 79, ഹിലാംമി എന്ന രാഹുല്‍ (30) ആണ് പള്ളിത്തോട്ടം പോലീസിന്‍റെ പിടിയിലായത്. കഴിഞ്ഞ ജൂണ്‍ മാസത്തില്‍ സീരിയലില്‍ അഭിനയിക്കാന്‍ അവസരം നല്‍കാമെന്ന് പറഞ്ഞ് പ്രായ പൂര്‍ത്തിയാകാത്ത പെണ്‍കുട്ടിയുമായി സൗഹൃദം സ്ഥാപിക്കുകയും പെണ്‍കുട്ടിയുടെ ഫോട്ടോകള്‍ മൊബൈല്‍ ഫോണ്‍ വഴി കരസ്ഥമാക്കുകയും ചെയ്തു. തുടര്‍ന്ന് ഈ ഫോട്ടോകള്‍ മോര്‍ഫ് ചെയ്ത് പെണ്‍കുട്ടിയെ കാണിച്ച് ഭീഷണിപ്പെടുത്തി കാറില്‍ കടത്തി കൊണ്ടു പോകുകയും കൊല്ലം ബൈപ്പാസിന് സമീപമുള്ള വീട്ടിലെത്തിച്ച് പീഡിപ്പിക്കുകയും ചെയ്തു. ഇയാള്‍ പിന്നീടും പെണ്‍കുട്ടിയെ ഭീഷണിപ്പെടുത്തി ലൈംഗികാതിക്രമം നടത്തിയിരുന്നു.
പെണ്‍കുട്ടി പോലീസിന് നല്‍കിയ പരാതിയില്‍ കേസ് രജിസ്റ്റര്‍ ചെയ്ത് നടത്തിയ അന്വേഷണത്തില്‍ ഇയാളെ പിടികൂടുകയായിരുന്നു. പോലീസ് ഇന്‍സ്പെക്ടര്‍ ഫയാസിന്‍റെ നിര്‍ദ്ദേശാനുസരണം എസ്.ഐ സാജന്‍, എ.എസ്.ഐ കൃഷ്ണകുമാര്‍, രാജേഷ്, എസ്.സി.പി.ഒ ഷാനവാസ് സി.പി.ഒ സുമ എന്നിവരടങ്ങിയ പോലീസ് സംഘമാണ് ഇയാളെ അറസ്റ്റ് ചെയ്യ്തത്.
