കത്തിരാജു പോലീസ് തെളിവെടുപ്പ്
കൊല്ലം: കടയ്ക്കല്‍ കാറ്റടിമൂട്ടില്‍ വാക്ക്തര്‍ക്കത്തെ തുടര്‍ന്ന് മധ്യവയസ്‌കനെ കുത്തി പരുക്കേല്‍പ്പിച്ച സംഭവത്തില്‍ അറസ്റ്റിലായ കത്തിരാജുവിനെ സംഭവസ്ഥലത്ത് എത്തിച്ച് തെളിവെടുത്തു. കഴിഞ്ഞ ഇരുപത്തിയാറിന് രാത്രി ആറരമണിയോടെ കാറ്റാടിമൂട് മാര്‍ക്കറ്റിനു സമീപമുള്ള കടത്തിണ്ണയില്‍ ഇരുന്ന കത്തിരാജുവും പ്രദേശവാസി അനിയും തമ്മില്‍ വാക്കുതര്‍ക്കം നടക്കുകയും തുടര്‍ന്ന് കത്തിരാജു കൈവശം ഉണ്ടായിരുന്ന കത്തി ഉപയോഗിച്ച് അനിയെ കുത്തി പരിക്കേല്‍പ്പിക്കുകയും ചെയ്തു.
മൂന്ന് കുത്താണ് അനിയെ ഇയാള്‍ കുത്തിയത്. കല്ല് ഉപയോഗിച്ച് അനി കത്തിരാജുവിന്റെ അടിച്ചിരുന്നു. തുടര്‍ന്ന് രണ്ട് പേരും ചീകിത്സയിലായിരുന്നു. വധശ്രമത്തിന് കേസെടുത്ത പോലീസ് കത്തി രാജുവിനെ ഇന്നലെ അറസ്റ്റ് ചെയ്യുകയായിരുന്നു. കത്തിരാജുവിന്റെ പേരില്‍ വധശ്രമത്തിനാണ് പോലീസ് കേസെടുത്തത്.
അനിയുടെ ആക്രമണത്തില്‍ കത്തിരാജുവിന്റെ നാലു വാരിയെല്ലുകള്‍ പൊട്ടിയിരുന്നു. ആക്രമിച്ച് ഗുരുതര പരുക്കേല്‍പിച്ചതിന് അനിക്കതിരെയും പോലീസ് കേസെടുത്തിട്ടുണ്ട്. അനി ഇപ്പോഴും ചീകിത്സയിലാണ്. കത്തിരാജുവിനെ സംഭവസ്ഥലത്ത് എത്തിച്ച് തെളിവെടുത്തെങ്കിലും കത്തി കണ്ടെടുക്കാന്‍ കഴിഞ്ഞില്ല. കോടതിയില്‍ ഹാജരാക്കി റിമാന്റ് ചെയ്ത കത്തിരാജുവിനെ കൂടുതല്‍ തെളിവെടുപ്പിനായി കസ്റ്റഡിയില്‍ വാങ്ങും. നിരവധി ക്രിമിനല്‍ കേസുകളില്‍ ഉള്‍പ്പെട്ട കത്തിരാജു ഗുണ്ടാലിസ്റ്റില്‍പെട്ടയാളാണ്.
