കൊല്ലം.രാത്രികാല പെട്രോളിംഗിനോടനുബന്ധിച്ച് പോലീസ് ഉദ്യോഗസ്ഥര്‍ നടത്തിയ വാഹന പരിശോധനയില്‍ യുവാവ് എം.ഡി.എം.എ യുമായി പിടിയിലായി. കണ്ണനല്ലൂര്‍ ചേരിക്കോണം സ്വദേശി കുന്നത്ത് വിള വീട്ടില്‍ രാഹൂല്‍ (31) ആണ് പോലീസിന്‍റെ പിടിയിലായത്.
ഇന്ന് വെളുപ്പിന് (06.09.2023) 2 മണിയോടെ കണ്ണനല്ലൂര്‍ ജംഗ്ഷനില്‍ പോലീസ് പടോളിങ് സംഘം വാഹന പരിശോധന നടത്തി വരവേ പ്രതി പോലീസിനെ കണ്ട് പരുങ്ങുകയും കാറില്‍ കയറി രക്ഷപെടാന്‍ ശ്രമിക്കുകയും ചെയ്തു. ഇത് കണ്ട് സംശയം തോന്നിയ സംഘം പ്രതിയുടെ കാര്‍ തടഞ്ഞു നടത്തിയ പരിശോധനയിലാണ് 4 ഗ്രാം എം.ഡി.എം.എ കണ്ടെത്തിയത്. പ്രതി പതിനായിരം രൂപ മുടക്കിയാണ് എം.ഡി.എം.എ വാങ്ങിയതെന്നാണ് പോലീസിന് നല്‍കിയ മൊഴി. ഇയാളില്‍ നിന്ന് കണ്ടെത്തിയ തൊണ്ടി മുതലും വാഹനവും കണ്ണനല്ലൂര്‍ പോലീസ് കസ്റ്റഡിയില്‍ എടുത്തു. കണ്‍ട്രോള്‍ റും ഇന്‍സ്പെക്ടര്‍ ജോസ്, കണ്ണനല്ലൂര്‍ ഇന്‍സ്പെക്ടര്‍ വി.ജയകുമാര്‍ എന്നിവരുടെ നേതൃത്വത്തില്‍ നടത്തിയ പരിശോധനയില്‍ എസ്.ഐ. ഗോപകുമാര്‍, എ.എസ്.ഐ. ഹരി സോമന്‍, എസ്.സി.പി.ഒ മാരായ ഹുസൈന്‍, പ്രമോദ്, സജി സി.പി.ഒ മാരായ അരുണ്‍, ഗിരീഷ്, സുധി എന്നിവരടങ്ങിയ സംഘവും പങ്കെടുത്തു
