കൊല്ലം.വയോധികനെ പങ്കായം കൊണ്ട് ക്രൂരമായി മര്‍ദ്ദിച്ച പ്രതി കിളികൊല്ലൂര്‍ പോലീസിന്‍റെ പിടിയിലായി. മങ്ങാട്, കൊച്ചുവിള വീട്ടില്‍ കരിക്കട്ട സുനി എന്ന സുനില്‍ (48) ആണ് പോലീസിന്‍റെ പിടിയിലായത്. അയല്‍പക്കത്തിലെ വീട്ടിലെ പൈപ്പ്ലൈനില്‍ നിന്നും പ്രതി അനധികൃതമായി വെള്ളമെടുക്കുന്നത് സമീപവാസിയായ നടരാജന്‍ വീട്ടുടമയെ അറിയിച്ചതിലുള്ള വിരോധമാണ് ആക്രമണത്തിലേക്ക് നയിച്ചത്. കഴിഞ്ഞ തിങ്കള്‍ ദിവസം വൈകുന്നേരം മങ്ങാട് കായല്‍ വാരത്ത് വലവീശികൊണ്ടിരുന്ന നടരാജന്‍റെ സമീപത്തേക്ക് വള്ളത്തിലെത്തിയ പ്രതി ഇയാളെ വലയില്‍ പിടിച്ച് വലിച്ച് കായലിലേക്ക് തള്ളിയിടുകയായിരുന്നു. തുടര്‍ന്ന് പങ്കായവും വള്ളത്തിലിരുന്ന ഇരുമ്പ് കമ്പിയും ഉപയോഗിച്ച് ക്രൂരമായി മര്‍ദ്ദിക്കുകയായിരുന്നു. മര്‍ദ്ദനത്തില്‍ നടരാജന്‍റെ വിരലിലെ അസ്ഥിക്ക് പൊട്ടല്‍ ഏറ്റിട്ടുണ്ട്. കിളികൊല്ലൂര്‍ പോലീസില്‍ നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത് പ്രതിയെ പിടികൂടുകയായിരുന്നു. ഇയാളുടെ പേരില്‍ നിരവധി ക്രിമിനല്‍ കേസുകള്‍ നിലവിലുണ്ട്. കിളികൊല്ലൂര്‍ ഇന്‍സ്പെക്ടര്‍ ഗിരീഷിന്‍റെ നേതൃത്വത്തില്‍ എസ്.ഐ. രാജേഷ്, അനില്‍ കുമാര്‍ എന്നിവരടങ്ങിയ സംഘമാണ് ഇയാളെ അറസ്റ്റ് ചെയ്തത്.
