കൊല്ലം: വീട് പണി നടക്കുന്ന സ്ഥലത്ത് നിന്നും നിര്‍മ്മാണ സാമഗ്രികള്‍ മോഷ്ടിച്ചെടുത്ത യുവാവ് പോലീസ് പിടിയിലായി. ശക്തികുളങ്ങര, കന്നിമേല്‍ ചേരിയില്‍ വരമ്പേല്‍ തെക്കതില്‍ വീട്ടില്‍ ശ്രീലാല്‍ (21) ആണ് ശക്തികുളങ്ങര പോലീസിന്റെ പിടിയിലായത്. കഴിഞ്ഞ കുറച്ചു നാളുകളായി രാമന്‍കുളങ്ങരയില്‍ നിര്‍മ്മാണത്തിലിരുന്ന വീട്ടില്‍ നിന്നും ഇയാള്‍ നിര്‍മ്മാണത്തിനായി സൂക്ഷിച്ചിരുന്ന ഇരുമ്പ് കമ്പികളും വയറിങ്ങ് കേബിളുകളും മോഷ്ടിക്കുകയായിരുന്നു. പല തവണകളായി സാമഗ്രികള്‍ മോഷണം പോയതിനെ തുടര്‍ന്ന് ഉടമ സിസിടിവി സ്ഥാപിച്ച് നിരീക്ഷണം നടത്തിയപ്പോഴാണ് പ്രതിയെ തിരിച്ചറിഞ്ഞത്.
തുടര്‍ന്ന് ശക്തികുളങ്ങര പോലീസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്യ്ത് ഇയാളെ അറസ്റ്റ് ചെയ്യുകയായിരുന്നു. സമാനമായ കുറ്റകൃത്യത്തിന് ഇയാള്‍ക്കെതിരെ കൊല്ലം വെസ്റ്റ് പോലീസ് സ്റ്റേഷനില്‍ മുമ്പും കേസ് രജിസ്റ്റര്‍ ചെയ്തിട്ടുണ്ട്.
