കൊല്ലം: മുന്‍വിരോധം നിമിത്തം യുവാവിനേയും ഭാര്യയേയും മര്‍ദ്ദിച്ച കേസില്‍ പ്രതികള്‍ പിടിയിലായി. പാരിപ്പള്ളി, കോട്ടയേക്കറം, കിഴക്കേവിള വീട്ടില്‍ മഞ്ചേഷ് (34), പാരിപ്പള്ളി, തെറ്റിക്കുഴി, ആശാരിവിള വീട്ടില്‍ ഗോകുല്‍ (30) എന്നിവരാണ് പാരിപ്പള്ളി പോലീസിന്റെ പിടിയിലായത്. പാരിപ്പള്ളി സ്വദേശിയായ യുവാവും പ്രതികളും തമ്മിലുണ്ടായിരുന്ന വിരോധത്തില്‍ കഴിഞ്ഞ വെള്ളിയാഴ്ച വൈകിട്ട് 3.30യോടെ പ്രതികള്‍ ബൈക്കില്‍ യുവാവിന്റെ വീട്ടിലെത്തുകയായിരുന്നു.
തുടര്‍ന്ന് ഇയാളെ പ്രതികള്‍ വീട്ടില്‍ നിന്ന് വിളിച്ചിറക്കി മര്‍ദ്ദിക്കുകയായിരുന്നു. പ്രതികള്‍ ഇരുവരും ചേര്‍ന്ന് ഇയാളെ മര്‍ദ്ദിക്കുന്നത് കണ്ട ഭാര്യ തടസ്സം പിടിക്കാന്‍ ചെന്ന സമയം പ്രതികള്‍ യുവതിയെ ഉപദ്രവിക്കുകയും കടന്നുപിടിക്കുകയും ചെയ്തു. പോലീസില്‍ നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത് നടത്തിയ അന്വേഷണത്തില്‍ പ്രതികളെ പിടികൂടുകയായിരുന്നു. നിരവധി ക്രിമിനല്‍ കേസുകളില്‍ പ്രതിയായ മഞ്ചേഷിനെ കഴിഞ്ഞ മൂന്നു മാസ കാലത്തേക്ക് ജില്ലയില്‍ നിന്ന് പുറത്താക്കിയിരുന്നു. പാരിപ്പള്ളി ഇന്‍സ്‌പെക്ടര്‍ ദീപുവിന്റെ നേതൃത്വത്തിലുള്ള പോലീസ് സംഘമാണ് പ്രതികളെ അറസ്റ്റ് ചെയ്തത്.
