കൊല്ലം: തിരുമുല്ലാവാരം ക്ഷേത്രത്തിന് സമീപം ബൈക്ക് തടഞ്ഞ് നിര്‍ത്തി യാത്രക്കാരെ കമ്പിവടി ഉപയോഗിച്ച് മര്‍ദ്ദിച്ച് പരിക്കേല്‍പ്പിച്ച യുവാവ് പിടിയിലായി. ഒട്ടേറെ ക്രിമിനല്‍ കേസുകളില്‍ പ്രതിയായ മനയില്‍കുളങ്ങര കല്ലുംപുറത്ത് വീട്ടില്‍ അനന്തു (32) ആണ് കൊല്ലം വെസ്റ്റ് പോലീസിന്റെ പിടിയിലായത്. ശക്തികുളങ്ങര കന്നിമേല്‍ച്ചേരി സ്വദേശി വിദ്യാസാഗര്‍(45) നെയും സുഹൃത്തായ പ്രശാന്തിനേയുമാണ് ഇയാള്‍ മര്‍ദ്ദിച്ച് പരിക്കേല്‍പ്പിച്ചത്. ശനിയാഴ്ച രാത്രി 11-ഓടെ സുഹൃത്തിനൊപ്പം ബൈക്കില്‍ വരുകയായിരുന്ന വിദ്യാസാഗറിനെ തിരുമുല്ലാവാരം ക്ഷേത്രത്തിന് സമീപത്തുള്ള റോഡില്‍ വച്ച് ഇയാള്‍ തടഞ്ഞ്നിര്‍ത്തി കമ്പിവടി ഉപയോഗിച്ച് മര്‍ദ്ദിക്കുകയായിരുന്നു.
മര്‍ദ്ദനത്തില്‍ പരിക്കേറ്റ വിദ്യാസാഗര്‍ നല്‍കിയ പരാതിയുടെ അടിസ്ഥാനത്തില്‍ കൊല്ലം വെസ്റ്റ് പോലീസ് കേസ് രജിസ്റ്റര്‍ ചെയ്യ്ത് ഇയാളെ പിടികൂടുകയായിരുന്നു.
