കൊട്ടിയം: കടയ്ക്ക് സമീപം ബോംബ് പോലുള്ള വസ്തു കണ്ടെത്തിയത് പരിഭ്രാന്തിക്കിടയാക്കി. നെടുമ്പന പുലിയില കിഴങ്ങുവിളമുക്കിനടുത്ത് സജീവിന്റെ ഉടമസ്ഥതയിലുള്ള എസ്ആര്‍ ഗ്ലാസ്സ് കടയ്ക്ക് പിറകിലായാണ് ചൊവ്വാഴ്ച രാവിലെ ബോംബ് പോലെയുള്ള വസ്തു കണ്ടെത്തിയത്. സജീവിന്റെ മാതാവ് പൊയ്കയില്‍ വീട്ടില്‍ സൗദമ്മാള്‍ കടയുടെ പുറകില്‍ വൃത്തിയാക്കാന്‍ എത്തിയപ്പോഴാണ് ഇത് ഇവരുടെ കാലില്‍ തട്ടിയത്. ബോള്‍ പോലെയുള്ള സാധനത്തില്‍ കുക്കറിന്റെ വിസില്‍ പോലെ എന്തോ ഒന്ന് ഉയര്‍ന്നു നില്‍ക്കുന്നതായി സംശയംതോന്നിയ ഇവര്‍ മകന്‍ സജീവിനെ വിവരം അറിയിക്കുകയുമായിരുന്നു. സജീവ് വിവരം കണ്ണനല്ലൂര്‍ പോലീസിനെ അറിയിച്ചു. സംഭവമറിഞ്ഞെത്തിയ കണ്ണനല്ലൂര്‍ പോലീസ് ബോംബ് സ്‌ക്വാഡിനെയും, ഡോഗ് സ്‌ക്വാഡിനേയും വിവരം അറിയിച്ചതിനെ തുടര്‍ന്ന് അവരെത്തി പരിശോധന നടത്തുകയും ബോംബ് അല്ലെന്ന് സ്ഥിരീകരിക്കുകയുമായിരുന്നു. ഇതൊടെയാണ് നാട്ടുകാര്‍ക്ക് ആശ്വാസമായത്. മുകളില്‍ പോയി പൊട്ടുന്ന അമിട്ടാണ് ഇതെന്നാണ് പോലീസ് പറഞ്ഞത്. സംഭവമറിഞ്ഞ് നിരവധി പേരാണ് ഇവിടെ തടിച്ചു കൂടിയത്.
