കൊട്ടാരക്കര: സദാനന്ദപുരം കനാല്‍കുളത്തില്‍ കുളിക്കാനിറങ്ങിയ രണ്ടു യുവാക്കൾ മുങ്ങിമരിച്ചു. ഇന്ന് വൈകിട്ട് നാലരയോടെയാണ് സംഭവം. വെട്ടിക്കവല കോയിക്കൽ ക്ഷേത്രത്തിനു സമീപം ആകാശ് ഭവനിൽ ആകാശ് (22), പുതിയിടത്തു പുത്തൻവീട്ടിൽ ശ്രീജിത്ത്(22) എന്നിവരാണ് മരണമട‌ഞ്ഞത്. സദാനന്ദപുരം കെ.ഐ.പി സബ് കാനാലിൻറെ ടണലിലാണ് യുവാക്കൾ കുളിക്കാൻ ഇറങ്ങിയത്. സുഹൃത്തായ വിഷ്ണുവിനൊപ്പമാണ് ഇരുവരും കുളിക്കാനെത്തിയത്. കനാലിനു സമീപമുള്ള കോട്ടൂർ ചിറഭാഗത്ത് ഇരുവരും സുഹൃത്തിനൊപ്പം സംസാരിച്ചിരിക്കുകയായിരുന്നു. തുടർന്നാണ് കുളിക്കാൻ ഇറങ്ങിയത്. കുളിക്കുന്നതിനിടെ രണ്ടു പേരും മുങ്ങിത്താഴുകയായിരുന്നു. കുളത്തിലിറങ്ങിയെങ്കിലും നീന്തൽ ആറിയാത്തതിനാൽ വിഷ്ണു തിരികെ കയറി .കരയിൽ ഫോൺ ഉപയോഗിച്ചു കൊണ്ടിരിക്കുന്നതിനിടെയാണ് ആകാശും ശ്രീജിത്തും അപകടത്തിൽപ്പെടുന്നത് കാണുന്നത്. തുടർന്ന് ബഹളം വച്ച് പരിസരവാസികളെ അറിയിക്കുകയായിരുന്നു.
കൊട്ടാരക്കരയിൽ നിന്ന് അഗ്നിരക്ഷാസേനയെത്തിയാണ് ഇരുവരുടെയും മൃതദേഹങ്ങൾ പുറത്തെടുത്തത്. മൃതദേഹങ്ങൾ കൊട്ടാരക്കര താലൂക്ക് ആശുപത്രി മോർച്ചറിയിൽ സൂക്ഷിച്ചിരിക്കുന്നു. കൊല്ലത്ത് ഫയർ ആൻഡ് സേഫ്ടി വിദ്യാർത്ഥി ആയിരുന്നു ശ്രീജിത്ത്. ഇലക്ട്രീഷ്യനായി ജോലി ചെയ്തിരുന്ന ആളായിരുന്നു ആകാശ്. നിർമ്മാണ കരാറുകാരൻ ശ്രീകുമാറിന്റെയും ജയയുടെയും മകനാണ് ശ്രീജിത്ത്. സഹോദരി: ശ്രീലക്ഷ്മി. നിർമ്മാണ തൊഴിലാളി മുരുകന്റെയും തൊഴിലുറപ്പ് തൊഴിലാളി സന്ധ്യയുടെയും മകനാണ് ആകാശ്. സഹോദരി: അർച്ചന. കൊട്ടാരക്കര പൊലീസ് കേസെടുത്തു.
