പൂയപ്പള്ളി: ഗൃഹനാഥന്‍ മദ്യലഹരിയില്‍ കുടുംബ കലഹം ഉണ്ടാക്കിയതിനെത്തുടര്‍ന്ന് പോലീസില്‍ വിവരമറിയിക്കുകയും പോലീസ് വീട്ടിലെത്തിയപ്പോള്‍ പോലീസിന്റെ മുന്നില്‍വച്ച് കിണറ്റില്‍ ചാടി മരിച്ചു. പൂയപ്പള്ളി നെയ്‌തോട് പാലവിള വീട്ടില്‍ ബെന്നി (50) ആണ് മരിച്ചത്.
കഴിഞ്ഞ ദിവസം രാത്രിയിലായിരുന്നു സംഭവം. ബെന്നി വീട്ടില്‍ അക്രമം നടത്തുന്നതായി ഭാര്യ പൂയപ്പള്ളി പോലീസില്‍ ഫോണ്‍ വിളിച്ച് അറിയിച്ചതിനെത്തുടര്‍ന്ന് പോലീസ് സ്ഥലത്തെത്തുകയും ഇയാളെ സ്റ്റേഷനിലേക്ക് കൂട്ടി കൊണ്ട് വരാന്‍ ശ്രമിക്കുന്നതിനിടെ പോലീസിന്റെ കണ്ണ് വെട്ടിച്ച് കിണറ്റില്‍ ചാടുകയുമായിരുന്നു. വിവരം അറിയിച്ചതിനെത്തുടര്‍ന്ന് ഫയര്‍ഫോഴ്‌സ് സംഘം എത്തി ഇയാളെ കരയ്‌ക്കെടുത്തെങ്കിലും മരിച്ചിരുന്നു. പൂയപ്പള്ളി പോലീസ് മേല്‍നടപടികള്‍ക്ക് ശേഷം പാരിപ്പള്ളി മെഡിക്കല്‍ കോളജില്‍ പോസ്റ്റുമോര്‍ട്ടം നടത്തി. മൃതദേഹം പൂയപ്പള്ളി സെന്റ് തോമസ് മാര്‍ത്തോമ്മ പള്ളിയില്‍ സംസ്‌കരിച്ചു.