ചടയമംഗലം: മുക്കുപണ്ടം പണയം വെച്ച് പണം തട്ടിയ യുവാവിനെ ചടയമംഗലം പോലീസ് അറസ്റ്റ് ചെയ്തു. നെടുവത്തൂര്‍ ആനക്കോട്ടൂര്‍ കുളങ്ങരമുക്ക് തലാപ്പില്‍ വീട്ടില്‍ സുബീഷ് (30)നെയാണ് അറസ്റ്റ് ചെയ്തത്. പ്രതി ആയൂരില്‍ മണിമുറ്റത്ത് ഫിനാന്‍സില്‍ 17.20 ഗ്രാം തൂക്കം വരുന്ന മുക്കുപണ്ടം പണയം വെച്ച് 82,000 രൂപ എടുത്തു. തുടര്‍ന്ന് ബാങ്കിന്റെ ഓഡിറ്റിങ്ങില്‍ മുക്കുപണ്ടം ആണെന്ന് കണ്ടെത്തിയതോടെ ബാങ്ക് മാനേജര്‍ ചടയമംഗലം പോലീസില്‍ പരാതി നല്‍കി.
ചടയമംഗലം പോലീസ് അന്വേഷിച്ച് വരുന്നതിനിടയില്‍ സമാനമായ കേസില്‍ പുത്തൂര്‍ പോലീസ് ഇയാളെ പിടികൂടുകയായിരുന്നു. ചോദ്യം ചെയ്യലില്‍ ചടയമംഗലം ആയൂരിലും മുക്കുപണ്ടം പണയം വച്ചതായി ഇയാള്‍ സമ്മതിച്ചു. പുത്തൂര്‍ പോലീസ് റിമാന്‍ഡ് ചെയ്ത പ്രതിയെ ചടയമംഗലം പോലീസ് കസ്റ്റഡിയില്‍ വാങ്ങി ആയൂര്‍ മണിമുറ്റത്ത് ഫിനാന്‍സില്‍ കൊണ്ടുവന്ന് തെളിവെടുപ്പ് നടത്തി. മെഡിക്കല്‍ പരിശോധനകള്‍ക്ക് ശേഷം കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.