ചാത്തന്നൂര്‍: ഗുണ്ടാ സംഘാംഗങ്ങള്‍ തമ്മില്‍ ഏറ്റുമുട്ടി രണ്ട് പേര്‍ക്ക് ഗുരുതര പരിക്ക്. കോയിപ്പാട് കരിക്കുഴിയില്‍ ബിജു, കോയിപ്പാട് രണ്ടാലുംമൂട്ടില്‍ പള്ളിവിളയില്‍ സുമേഷ് എന്നിവര്‍ക്കാണ് പരിക്കേറ്റത്.
സംഭവത്തെ കുറിച്ച് പോലീസ് പറയുന്നത് ഇങ്ങനെ; കഴിഞ്ഞ ദിവസം ചാത്തന്നൂര്‍ എസ്എംപി സ്‌കൂളിന് സമീപമാണ് സംഘര്‍ഷം ഉണ്ടായത്. ബൈക്കില്‍ എത്തിയ സംഘം
റോഡ് സൈഡിലുള്ള കടയില്‍ ഇരുന്ന് മദ്യപിച്ച ശേഷം വാക്കുതര്‍ക്കത്തെത്തുടര്‍ന്ന് ഏറ്റുമുട്ടുകയായിരുന്നു. കല്ലും കട്ടകളും ഉപയോഗിച്ചുള്ള ആക്രമണത്തിലാണ് രണ്ട് പേര്‍ക്കും പരിക്കേറ്റത്. റോഡിലൂടെ പോയ വാഹനയാത്രികര്‍ പോലീസ് സ്റ്റേഷനില്‍ വിവരം അറിയിക്കുകയും പോലീസെത്തി ഇരുവരെയും പാരിപ്പള്ളി മെഡിക്കല്‍ കോളേജിലും ഗുരുതരമായി പരിക്കേറ്റതിനാല്‍ അവിടെ നിന്നും ഇരുവരെയും തിരുവനന്തപുരം മെഡിക്കല്‍ കോളേജിലേക്കും മാറ്റുകയായിരുന്നു. നിരവധി ക്രിമിനല്‍ കേസുകളില്‍ പ്രതികളാണ് ഇരുവരുമെന്നും പോലീസ് അറിയിച്ചു.
