ശാസ്താംകോട്ട: കാത്തിരിപ്പ് കേന്ദ്രത്തില്‍ ഇരിക്കവേ ഇരിപ്പിടം തകര്‍ന്നു ഓടയിലേക്ക് വീണ് മുസ്ലിം യൂത്ത് ലീഗ് നേതാവ് മരിച്ചു. കുന്നത്തൂര്‍ ശൂരനാട് വടക്ക് തെക്കേമുറി റംസാന്‍ നിവാസില്‍ റംസാന്‍ അലി (34) ആണ് മരിച്ചത്. ഇന്നലെ രാവിലെ ചങ്ങനാശ്ശേരി റെയില്‍വേ മേല്‍ പാലത്തിന് സമീപം മരിച്ച നിലയില്‍ കണ്ടെത്തുകയായിരുന്നു.
കഴിഞ്ഞദിവസം വീട്ടില്‍ നിന്നും ബിസിനസ് ആവശ്യാര്‍ത്ഥം ബാംഗ്ലൂരിലേക്ക് പോകാനുള്ള യാത്ര മധ്യേ ചങ്ങനാശ്ശേരി റെയില്‍വേ മേല്‍പ്പാലത്തിന് സമീപമുള്ള കാത്തിരിപ്പ് കേന്ദ്രത്തില്‍ ഇരിക്കവേ ഇരിപ്പിടം തകര്‍ന്ന് ഓടയിലേക്ക് വീണാണ് മരണം സംഭവിച്ചതെന്നാണ് പോലീസ് നിഗമനം.
കോട്ടയം മെഡിക്കല്‍ കോളേജില്‍ പോസ്റ്റ്‌മോര്‍ട്ടതിനുശേഷം ശൂരനാട് വടക്ക് മുസ്ലിം ജമാഅത്ത് പള്ളിയില്‍ സംസ്‌കരിച്ചു. മുസ്ലിം യൂത്ത് ലീഗ് സംസ്ഥാന കമ്മിറ്റി അംഗം, മുസ്ലിംലീഗ് ശൂരനാട് വടക്ക് പഞ്ചായത്ത് കമ്മിറ്റി ട്രഷറര്‍ എന്നീ നിലകളില്‍ പ്രവര്‍ത്തിച്ചിട്ടുണ്ട്. ഭാര്യ: സമീറ (ആലുവ കാര്‍ഷിക ഗ്രാമ വികസന ബാങ്ക് അസിസ്റ്റന്റ് മാനേജര്‍).
