ചാത്തന്നൂര്‍: ദേശീയപാതയില്‍ കാര്‍ കത്തി ഡ്രൈവര്‍ മരിച്ചു. കാര്‍ യാത്രികന്‍ ആത്മഹത്യ ചെയ്തതാണെന്ന് സൂചന. കാരംകോട് തട്ടാരുകോണം ജെയ്‌നു നിവാസില്‍ ജയ്‌നു (58)ആണ് മരിച്ചത്.
ഇന്ന് വൈകുന്നേരം 6.30-ഓടെ കൊല്ലം-തിരുവനന്തപുരം ദേശീയപാതയില്‍ സ്പിന്നിംഗ് മില്ലിന് സമീപം മാന്‍കുന്നം ആശുപത്രിയ്ക്ക് മുന്നിലായാണ് അപകടം ഉണ്ടായത്. നിര്‍മ്മാണപ്രവൃത്തി നടക്കുന്നതിനാല്‍ ദേശീയപാതയില്‍ മധ്യഭാഗത്തായി ഒഴിച്ചിട്ടിരുന്ന സ്ഥലത്ത് കാര്‍ നിര്‍ത്തിയിട്ട ശേഷം തീകൊളുത്തിയതെന്നാണ് പോലീസിന്റെ നിഗമനം.
തീ ആളി കത്തുന്നത് കണ്ട് നാട്ടുകാര്‍ ഓടികൂടി പോലീസിനെയും ഫയര്‍ ഫോഴ്‌സിനെയും വിവരം അറിയിക്കുകയായിരുന്നു. തുടര്‍ന്ന് ചാത്തന്നൂര്‍ പോലീസും പരവൂരില്‍ നിന്നും ഫയര്‍ഫോഴ്‌സ് സംഘവും സ്ഥലതെത്തി തീയണയ്ക്കുകയായിരുന്നു. ചാത്തന്നൂര്‍ പോലീസ് മേല്‍നടപടികള്‍ സ്വീകരിച്ചു. മൃതദേഹം പാരിപ്പള്ളി മെഡിക്കല്‍ കോളേജിലേക്ക് മാറ്റി. ഭാര്യ: ചിത്ര. മകള്‍: അഞ്ജിത. മരുമകന്‍: റോയി ഹിലാരി.
