ചവറ. വികാസ് കലാസാംസ്കാരിക സമിതി, വികാസ് ലൈബ്രറി എന്നിവയുടെ ആഭിമുഖ്യത്തിൽ സംഘടിപ്പിക്കുന്ന പടവുകൾ വിദ്യാഭ്യാസ പരിപാടി ജൂൺ 30 ഞായറാഴ്ച വൈകിട്ട് മൂന്നിന് വികാസ് ഓഡിറ്റോറിയത്തിൽ നടക്കും. ഈ വർഷം എസ്.എസ്.എൽ.സി, പ്ലസ് ടു പരീക്ഷകളിൽ ഫുൾ എ പ്ലസ് നേടിയ ചവറ ഗ്രാമപഞ്ചായത്ത് നിവാസികളായ മുഴുവൻ വിദ്യാർത്ഥികളെയും അനുമോദിക്കും. പ്രൊഫഷണൽ കോഴ്സിന് പഠിക്കുന്ന മൂന്നു വിദ്യാർത്ഥികൾക്ക് വിവിധ എൻഡോവ്മെന്റുകളുടെ ധനസഹായത്തോടെ പഠന ചെലവുകൾ വഹിക്കും. കോഴ്സ് കാലാവധി പൂർത്തീകരിക്കും വരെ സഹായം തുടരും. യു.പി മുതൽ ഹൈസ്കൂൾ ക്ലാസുകൾ വരെ പഠിക്കുന്ന 75 വിദ്യാർഥികൾക്ക് പഠനോപകരണങ്ങളും നൽകും. അനുമോദന ചടങ്ങനു മുൻപായി ഡോക്ടർ ബിജു ടെറൻസിന്റെ മോട്ടിവേഷൻ ക്ലാസും സംഘടിപ്പിച്ചിട്ടുണ്ട്. തുടർന്ന് നടക്കുന്ന അനുമോദന സമ്മേളനം ഡോക്ടർ സുജിത് വിജയൻ പിള്ള എം.എൽ.എ ഉദ്ഘാടനം ചെയ്യും. ജില്ലാ പഞ്ചായത്ത് മെമ്പർ സി.പി സുധീഷ് കുമാർ ഗ്രാമപഞ്ചായത്ത് പ്രസിഡന്റ് ജി. സുരേഷ് കുമാർ തുടങ്ങിയവർ പങ്കെടുക്കും.
