കരീപ്ര: കൃഷി വകുപ്പ് നല്‍കിയ നെല്‍വിത്ത് വിതച്ച് 14 ദിവസം കഴിഞ്ഞും മുളയ്ക്കാത്തത്തില്‍ ദുരിതത്തിലായിരിക്കുകയാണ് കരീപ്ര തളവൂര്‍കോണം ഏലായിലെ കര്‍ഷകര്‍.
ലോണെടുത്തും, കടം വാങ്ങിയും കൃഷിയിടം ഒരുക്കി കൃഷി വകുപ്പ് നല്‍കിയ വിത്തും വിതച്ച് അവ മുളപൊട്ടുന്നതും നോക്കിയിരുന്ന കര്‍ഷകരുടെ പ്രതീക്ഷയാണ് വാടി തളര്‍ന്നു പോയത്. 70 ഏക്കാറോളം കൃഷി ഭൂമിയില്‍ ഉമ ഇനത്തില്‍ കൃഷി വകുപ്പ് നല്‍കിയ വിത്ത് പാകി യെങ്കിലും നിരാശയാണ് കര്‍ഷകര്‍ക്ക് ബാക്കിയായത്.
കനത്ത നഷ്ടമാണ് മുളയ്ക്കാത്ത വിത്ത് പാകി കൃഷി ഇറക്കിയതിലൂടെ കര്‍ഷകര്‍ക്ക് ഉണ്ടായിരിക്കുന്നത്. കര്‍ഷകര്‍ക്കുണ്ടായ നഷ്ടത്തിന് നഷ്ട പരിഹാരം നല്‍കാന്‍ കൃഷി വകുപ്പ് തയ്യാറാവണമെന്നാണ് പാടശേഖര സമിതി ആവശ്യപ്പെടുന്നത്.
ഇതുസംബന്ധിച്ച് കൃഷി മന്ത്രി, ധനകാര്യ വകുപ്പ് മന്ത്രി, കൃഷി വകുപ്പ് ഉദ്യോഗസ്ഥര്‍, ത്രിതല പഞ്ചായത്ത് കേന്ദ്രങ്ങള്‍ എന്നിവിടങ്ങളില്‍ പരാതി നല്‍കിയതായും നഷ്ട പരിഹാരം കിട്ടാത്ത പക്ഷം കര്‍ഷകര്‍ കൂടുതല്‍ പ്രതിഷേധവുമായി രംഗത്ത് വരുമെന്നും ഏലാ സമിതി പ്രസിഡന്റ് വിജയകുമാര്‍, സെക്രട്ടറി ചന്ദ്രശേഖരന്‍ പിള്ള എന്നിവര്‍ പറഞ്ഞു.
