ചാത്തന്നൂര്‍: ചിറക്കരയില്‍ പേപ്പട്ടിയുടെ ആക്രമണത്തില്‍ അഞ്ചരവയസുകാരനുള്‍പ്പെടെ അഞ്ചോളം പേര്‍ക്ക് പരിക്ക്. നിരവധി തെരുവ് നായകള്‍ക്കും പശുക്കള്‍ക്കും പേപ്പട്ടിയുടെ കടിയേറ്റു. ചിറക്കര നാഗത്തറ വടക്കതില്‍ വീട്ടില്‍ ബിജു (47), വി.എസ്. നിവാസില്‍ വിഗ്‌നേഷ് (12), കമലാലയത്തില്‍ പുഷ്പവല്ലി (56), മീനമ്പലം മഞ്ജു ഭവനില്‍ രമണി, തിരുവാതിരയില്‍ മോഹന്‍ദാസ് (65), ബിന്ദുഭവനില്‍ അഞ്ചര വയസുകാരന്‍ അതിഥി എന്നിവര്‍ക്കാണ് കടിയേറ്റത്.
ഇതില്‍ മോഹന്‍ദാസിനാണ് കൂടുതലായി പരിക്കേറ്റത്. ഉച്ചയോടെ ചിറക്കര ക്ഷേത്രത്തിന് സമീപമുള്ള മാര്‍ക്കറ്റിലാണ് പേപ്പട്ടിയുടെ ആക്രമണം ഉണ്ടായത്. മാര്‍ക്കറ്റില്‍ തമ്പടിച്ചിരുന്ന നിരവധി തെരുവ് നായ്ക്കളെയും റോഡ് സൈഡിലും വീടുകളിലും കെട്ടിയിരുന്ന പശുക്കള്‍ക്കുനേരെയുമാണ് ആക്രമണം ഉണ്ടായത്. കടിയേറ്റവരെ പാരിപ്പള്ളി മെഡിക്കല്‍ കോളേജില്‍ പ്രവേശിപ്പിച്ചു. മൃഗസംരക്ഷണ വകുപ്പ് അധികൃതര്‍ സ്ഥലത്തെത്തി പശുക്കള്‍ക്കും മറ്റും കുത്തിവയ്പ്പ് എടുക്കുന്നതിനുള്ള നടപടികള്‍ സ്വീകരിച്ചു.
