ചാത്തന്നൂര്‍: കൊല്ലം-തിരുവനന്തപുരം ദേശീയപാതയില്‍ കാറും ടാങ്കര്‍ ലോറിയും കൂട്ടിയിടിച്ച് മൂന്നു പേര്‍ക്ക് പരിക്ക്. കോട്ടയം മണക്കാട് സ്വദേശികളായ ജോഷി, ജയമോള്‍, ഇവരുടെ മകള്‍ അഞ്ജന എന്നിവര്‍ക്കാണ് പരിക്കേറ്റത്.
ഉച്ചയ്ക്ക് 2.45ന് കല്ലുവാതുക്കല്‍ പാറയില്‍ ജങ്ഷനില്‍ ആണ് അപകടം ഉണ്ടായത്. കോട്ടയം മണക്കാട് നിന്നും ആറ്റിങ്ങല്‍ എഞ്ചിനീയറിങ് കോളേജിലേക്ക് വന്ന കാറില്‍ തിരുവനന്തപുരം എയര്‍പോര്‍ട്ടില്‍ നിന്നും എറണാകുളത്തേക്ക് പോയ ടാങ്കര്‍ ലോറി ഇടിക്കുകയായിരുന്നു. അമിത വേഗത്തില്‍ എത്തിയ ടാങ്കര്‍ ലോറിയുടെ മുന്‍വശത്തെ ടയര്‍ പഞ്ചറായി എതിര്‍ ദിശയില്‍ വന്ന കാറില്‍ ഇടിക്കുകയായിരുന്നു.
കാര്‍ ഓടിച്ചിരുന്ന ജോഷിയെ അപകടസ്ഥലത്ത് എത്തിയ നാട്ടുകാരും പോലീസും ചേര്‍ന്ന് കാര്‍ വെട്ടി പൊളിച്ചാണ് പുറത്തെടുത്തത്. ജോഷിയെ ഗുരുതരപരിക്കുകളോടെ തിരുവനന്തപുരം മെഡിക്കല്‍ കോളേജിലേക്കും മറ്റുള്ളവരെ പാരിപ്പള്ളി മെഡിക്കല്‍ കോളേജിലും പ്രവേശിപ്പിച്ചു.
