കൊട്ടാരക്കര: ഒന്‍പത് വയസുള്ള പെണ്‍കുട്ടിയെ ലൈംഗികമായി പീഡിപ്പിച്ച കേസില്‍ പ്രതിയ്ക്ക് 43 വര്‍ഷം കഠിന തടവും 30,000 രൂപ പിഴയും ശിക്ഷ. കടയ്ക്കല്‍ പുലിപ്പാറ മണികണ്ഠന്‍ചിറ വിഷ്ണു ഭവനില്‍ ഉണ്ണി എന്ന് വിളിക്കുന്ന വിഷ്ണു(36)വിനെ ആണ് കൊട്ടാരക്കര ഫാസ്റ്റ് ട്രാക്ക് സ്‌പെഷ്യല്‍ കോര്‍ട്ട് ജഡ്ജി അഞ്ജു മീരാ ബിര്‍ള ശിക്ഷിച്ചത്.
2021 ഏപ്രില്‍ മാസത്തില്‍ നടന്ന സംഭവത്തില്‍ കടയ്ക്കല്‍ പോലീസ് ഇന്‍സ്‌പെക്ടര്‍ പി.എസ് രാജേഷ് എഫ്‌ഐആര്‍ രജിസ്റ്റര്‍ ചെയ്ത് അന്വേഷണം പൂര്‍ത്തിയാക്കി ചാര്‍ജ്ജ്ഷീറ്റ് സമര്‍പ്പിച്ചിരുന്നു. അതിജീവത വീട്ടുമുറ്റത്ത് കളിച്ചു കൊണ്ടിരിക്കുന്ന സമയം പ്രതി പെണ്‍കുട്ടിയെ കൂട്ടികൊണ്ടു പോയി പീഡിപ്പിക്കുകയും, പുറത്തു പറഞ്ഞാല്‍ കൊല്ലുമെന്ന് പറഞ്ഞ് ഭീഷണിപ്പെടുത്തുകയും ചെയ്തു എന്നാണ് കേസ്. പ്രോസിക്ക്യൂഷന് വേണ്ടി സ്‌പെഷ്യല്‍ പ്രോസിക്യൂട്ടര്‍ ഷുഗു.സി. തോമസ് ഹാജരായി.