ഓയൂര്‍: വെളിയം കുടവട്ടൂര്‍ ഉളക്കോട് ക്വാറിയിലെ വെള്ളക്കെട്ടില്‍ കുളിക്കാന്‍ ഇറങ്ങിയ പോണ്ടിച്ചേരി സ്വദേശിയായ യുവാവ് മരണപ്പെട്ടു. പോണ്ടിച്ചേരി സ്വദേശി ഇമ്മാനുവല്‍ ഡാനിയേല്‍ (20) ആണ് മരിച്ചത്. കൂടെ കുളിക്കാന്‍ ഇറങ്ങിയ തിരുവനന്തപുരം കരകുളം മുല്ലശ്ശേരി ശ്രീവിലാസത്തില്‍ ഹേമന്ദ് (34) രക്ഷപ്പെട്ടു.
ഞായറാഴ്ച ഉച്ച കഴിഞ്ഞായിരുന്നു സംഭവം. വിനോദ സഞ്ചാരത്തിനായി പോകുന്ന വഴി ഈ പ്രദേശത്ത് എത്തിയ എട്ടംഗ സംഘത്തില്‍പ്പെട്ടവരാണ് അപകടത്തില്‍പ്പെട്ടത്. വിദ്യാര്‍ത്ഥികള്‍ ഉള്‍പ്പെട്ട സംഘത്തില്‍ ഇമ്മാനുവേല്‍ ഡാനിയേലും ഹേമന്ദും കുളിക്കുന്നതിനായി കുളത്തില്‍ ഇറങ്ങി. ഇതിനിടെ അപകടത്തില്‍പ്പെടുകയായിരുന്നു.
ഇവര്‍ മുങ്ങിത്താഴ്ന്നപ്പോള്‍ കൂടെ ഉണ്ടായിരുന്ന പെണ്‍കുട്ടി ഉള്‍പ്പെടെയുള്ള സുഹൃത്തുക്കള്‍ നിലവിളിച്ചു. നിലവിളി കേട്ട് സമീപത്ത് മരം മുറിക്കുകയായിരുന്ന തൊഴിലാളികള്‍ ക്വാറിക്ക് സമീപത്തേക്ക് എത്തി വടം ഇട്ടു കൊടുത്തു. ഹേമന്ദ് ഈ വടത്തില്‍ പിടിച്ച് നിന്നു. എന്നാല്‍ ഇമ്മാനുവല്‍ ഡാനിയേലിനെ രക്ഷിക്കാനായില്ല. തുടര്‍ന്ന് കുണ്ടറയില്‍ നിന്നുള്ള ഫയര്‍ഫോഴ്‌സ് ഉദ്യോഗസ്ഥര്‍ എത്തി വടത്തില്‍ പിടിച്ച് നിന്ന ഹേമന്ദിനെ രക്ഷപ്പെടുത്തുകയായിരുന്നു. സ്‌കൂബാ ടീമെത്തിയാണ് ഇമ്മാനുവേല്‍ ഡാനിയേലിന്റെ മൃതദേഹം ക്വാറിയില്‍ നിന്ന് പുറത്തെടുത്തത്. മൃതദേഹം കൊട്ടാരക്കര താലൂക്ക് ആശുപത്രി മോര്‍ച്ചറിയില്‍.