കരുനാഗപ്പള്ളി. യുവതിയും സുഹൃത്തും യാത്ര ചെയ്ത ബൈക്കിനെ പിന്തുടർന്ന് ആക്രമിച്ച കേസിലെ പ്രതികളിൽ രണ്ടുപേർ പിടിയിൽ. അയണിവേലിക്കുളങ്ങര തെക്ക് മനു വിഹാർ വീട്ടിൽ അഖിൽ ( 23) കോഴിക്കോട് മേക്ക് അനിൽ ഭവനം വീട്ടിൽ അരുൺ (21) എന്നിവരാണ് കരുനാഗപ്പള്ളി പോലീസിന്റെ പിടിയിലായത്.
ഇക്കഴിഞ്ഞ വ്യാഴാഴ്ച വൈകിട്ട് പരാതിക്കാരിയും സുഹൃത്തും ബൈക്കിൽ യാത്ര ചെയ്തു വരികെ സ്കൂട്ടറിൽ എത്തിയ മൂവർ സംഘം ചീത്തവിളിക്കുകയും ചീത്ത വിളിച്ചത് എന്തിനാണെന്ന് യുവതി ചോദിച്ചതിന്റെ വൈരാഗ്യത്താൽ തറയിൽ മുക്കിൽ നിന്ന് പിന്തുടർന്ന് ലാലാജി ജംഗ്ഷനിൽ വച്ച് പ്രതികൾ സഞ്ചരിച്ച സ്കൂട്ടർ വാഹനത്തിന് കുറുകെ വെച്ച് ആവലാതിക്കാരിയെയും സുഹൃത്തിനെയും മർദ്ദിച്ച ശേഷം കടന്നുകളയുകയായിരുന്നു .പെൺകുട്ടിയുടെ പരാതിയിൽ കേസെടുത്ത് കരുനാഗപ്പള്ളി പോലീസ് നിരവധി സിസിടിവി ദൃശ്യങ്ങൾ പരിശോധിച്ചതിൽ നിന്ന് പ്രതികളെ കണ്ടെത്തുകയായിരുന്നു.
സംഭവത്തിനുശേഷം ഒളിവിൽ പോയ ഒരു പ്രതിയെ അന്വേഷിക്കുകയാണെന്നും ഉടനെ പിടി കൂടുമെന്നും പോലീസ് അറിയിച്ചു. കരുനാഗപ്പള്ളി പോലീസ് സ്റ്റേഷൻ എസ് ഐ ഷമീർ ,ഷാജിമോൻ എസ് സി പി ഓ ഹാഷിം സിപി ഓ മാരായ പ്രശാന്ത്, നൗഫൽ ജാൻ, സുമിത്ത് എന്നിവരടങ്ങിയ സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
