കരുനാഗപ്പള്ളി: മദ്യവും പുകയില ഉല്‍പ്പന്നങ്ങളുമായി യുട്യൂബര്‍ പിടിയില്‍. ആയിരംതെങ്ങ്-അഴീക്കല്‍ പാലത്തിന് വടക്കുവശം വാടകയ്ക്ക് താമസിക്കുന്ന അനന്തുലാലി(28)നെയാണ് കരുനാഗപ്പള്ളി എക്‌സൈസ് നടത്തിയ പരിശോധനയില്‍ പിടികൂടിയത്. ഇയാള്‍ വിദേശ മദ്യം ഗോവയില്‍ നിന്ന് കടത്തിക്കൊണ്ടുവന്ന് രഹസ്യമായി വില്‍പ്പന നടത്തിവരികയായിരുന്നു. അനന്തുലാലിന്റെ വീട്ടില്‍ നടത്തിയ പരിശോധനയില്‍ 10 കുപ്പി വിദേശ മദ്യം കണ്ടെടുത്തു. വീടിനു മുന്‍വശം പാര്‍ക്ക് ചെയ്തിരുന്ന കാറില്‍ നിന്ന് 13 കിലോ ഗ്രാം പാന്‍ മസാലയും കണ്ടെടുത്തിട്ടുണ്ട്. വാഹനവും എക്‌സൈസ് കസ്റ്റഡിയിലെടുത്തു. അനന്തുലാല്‍ കര്‍ണാടകയിലെ വിദ്യാഭ്യാസ സ്ഥാപനങ്ങളില്‍ അഡ്മിഷന്റെ കോ-ഓര്‍ഡിനേറ്ററാണെന്നും വിവരമുണ്ട്.
ഓണക്കാലത്തിന് മുന്നോടിയായി കേരളത്തിന് പുറത്തുനിന്ന് കുറഞ്ഞ വിലക്കുള്ള മദ്യം കടത്തിക്കൊണ്ടുവരുന്നതായ കൊല്ലം എക്‌സൈസ് ഇന്റലിജന്‍സിന്റെ വിവരത്തെ തുടര്‍ന്നാണ് പരിശോധന നടന്നത്. എക്‌സൈസ് റേഞ്ച് ഇന്‍സ്‌പെക്ടര്‍ ലതീഷ്. എസ്, എക്‌സൈസ് ഇന്‍സ്‌പെക്ടര്‍ (ഗ്രേഡ്) മനോജ് കുമാര്‍, അസിസ്റ്റന്റ് എക്‌സൈസ് ഇന്‍സ്‌പെക്ടര്‍ എബിമോന്‍.കെ. വി, ഐബി പ്രിവന്റിവ് ഓഫീസര്‍ മനു.ആര്‍. തുടങ്ങിയവര്‍ നേതൃത്വം നല്‍കി.