കരുനാഗപ്പള്ളി. ക്ലാപ്പന ഇഎംഎസ് ലൈബ്രറി ഏർപ്പെടുത്തിയ ഈ വർഷത്തെ ഓണാട്ടുകര പ്രതിഭാ പുരസ്കാര സമർപ്പണവും തോപ്പിൽ ഭാസി ജന്മശതാബ്ദി ആഘോഷവും വിവിധ പരിപാടികളോടെ സംഘടിപ്പിക്കുമെന്ന് സംഘാടകർ വാർത്താ സമ്മേളനത്തിൽ പറഞ്ഞു. ഇത്തവണത്തെ ഓണാട്ടുകര പ്രതിഭാ പുരസ്കാരം കാർഷിക മേഖലയിലെ സമഗ്ര സംഭാവനകൾ പരിഗണിച്ച് കരുനാഗപ്പള്ളി ബോയ്സ് ഹയർ സെക്കൻഡറി സ്കൂൾ അധ്യാപകൻ വി രഘുത്തമന് സമ്മാനിക്കുമെന്ന് ഭാരവാഹികൾ അറിയിച്ചു.
11,111 രൂപയും ശില്പവും പ്രശസ്തി പത്രവും അടങ്ങുന്നതാണ് പുരസ്കാരം.
അധ്യാപനത്തോടൊപ്പം കാർഷിക വൃത്തിയും സ്വന്തം ആലയിൽ നിന്നും പണിയായുധങ്ങൾ നിർമ്മിച്ചെടുക്കുന്നതിലും കാലി വളർത്തൽ, നാടൻ കൃഷി രീതികളുടെ പ്രചാരണം എന്നിവയിലും വേറിട്ട മാതൃകകൾ സൃഷ്ടിച്ച അധ്യാപകനാണ് വി രഘുത്തമൻ എന്ന് അവാർഡ് കമ്മിറ്റി വിലയിരുത്തി. ഓണാട്ടുകരയുടെ വിപ്ലവകാരി തോപ്പിൽഭാസിയുടെ ജന്മശതാബ്ദിയോടനുബന്ധിച്ച് “പൊന്നരിവാളമ്പിളിയിൽ കണ്ണെറിഞ്ഞ നൂറു വർഷങ്ങൾ ” എന്ന പേരിൽ സെപ്റ്റംബർ 17ന് സംഘടിപ്പിക്കുന്ന പ്രത്യേക പരിപാടിയിൽ പ്രമുഖ വ്യക്തികൾ പങ്കെടുക്കുമെന്നും സംഘാടകർ അറിയിച്ചു. തോപ്പിൽഭാസിയുടെ മക്കളായ സോമനും, മാലയും വിശിഷ്ട അതിഥികളായി പങ്കെടുക്കും. തുടർന്ന് കെപിഎസിയുടെ ഒളിവിലെ ഓർമ്മകൾ എന്ന നാടകത്തിൻ്റെ അവതരണവും ഉണ്ടാകും.
