കൊല്ലം: കൊട്ടിയം ഭാഗത്ത് എക്‌സൈസ് നടത്തിയ പരിശോധനയില്‍ ഇതരസംസ്ഥാന തൊഴിലാളികള്‍ താമസിച്ചുവരുന്ന കെട്ടിടത്തിന്റെ മൂന്നാംനിലയിലെ മുറിയില്‍നിന്നും ലഹരി ഉപയോഗത്തിനായി ചട്ടിയില്‍ നട്ടുവളര്‍ത്തിവന്ന കഞ്ചാവ് ചെടി കണ്ടെടുത്തു.
കഞ്ചാവ് ചെടി നട്ടുവളര്‍ത്തിവന്ന പശ്ചിമബംഗാള്‍ മാള്‍ഡ സ്വദേശി കമാല്‍ ഹുസൈന്‍ (25) ആണ് പിടിയിലായത്. മൂന്ന് വര്‍ഷമായി കേരളത്തില്‍ പലസ്ഥലങ്ങളിലായി ജോലിചെയ്തുവരുന്നയാളാണ്. മൂന്ന് മാസമായി കൊട്ടിയത്ത് താമസിച്ചുവരുന്ന ഇയാള്‍ കഞ്ചാവ് ഉപയോഗിക്കുന്ന വ്യക്തിയാണ്. എക്‌സൈസ് ഇന്‍സ്‌പെക്ടര്‍ ദിലീപ്.സി.പിയുടെ നേതൃത്വത്തിലായിരുന്നു പരിശോധന.
പരിശോധനയില്‍ അസി. എക്‌സൈസ് ഇന്‍സ്‌പെക്ടര്‍ (ഗ്രേഡ്) പ്രേംനസീര്‍, പ്രിവന്റീവ് ഓഫീസര്‍ പ്രസാദ്കുമാര്‍ ജെ.ആര്‍, സിവില്‍ എക്‌സൈസ് ഓഫീസര്‍മാരായ അനീഷ് എം.ആര്‍, ബാലു എസ്.സുന്ദര്‍, അഭിരാം, വനിതാ സിവില്‍ എക്‌സൈസ് ഓഫീസര്‍ ഗംഗ എന്നിവര്‍ പങ്കെടുത്തു. പ്രതിയെ റിമാന്‍ഡ് ചെയ്തു.
