റോഡരികില്‍ നിര്‍ത്തിയിടുന്ന വലിയ വാഹനങ്ങളുടെ ബാറ്ററി മോഷ്ടിക്കുന്ന സംഘം പിടിയിലായി. കൊല്ലം ശൂരനാട് നോര്‍ത്ത് വടക്കുമുറിയില്‍ പ്രമോദ് ഭവനം ഭവനത്തില്‍ പ്രദീപ് (43), കൊല്ലം ശൂരനാട് നോര്‍ത്ത് തെക്കേ മുറിയില്‍ വലിയറക്കത്ത് കിടപ്പുര വീട്ടില്‍ സമദ് (43) എന്നിവരെയാണ് നൂറനാട് പൊലീസ് അറസ്റ്റ് ചെയ്തത്.
സെപ്തംബര്‍ 9ന് പുലര്‍ച്ചെ കൊല്ലം-തേനി ദേശീയ പാതയില്‍ ചാവടി ജംഗ്ഷന് സമീപം നിര്‍ത്തിയിട്ടിരുന്ന ഭാരത് ബെന്‍സ് ലോറിയുടെ പുതിയ ബാറ്ററികളാണ് മോഷണം പോയത്. ആദിക്കാട്ടുകുളങ്ങര സ്വദേശി ഷമീറിന്റെ ഉടമസ്ഥതയിലുള്ള ലോറിയാണിത്. 40,000 രൂപ വില വരുന്ന ബാറ്ററികളാണ് വെളുപ്പിന് സ്‌കൂട്ടറില്‍ എത്തിയ പ്രതികള്‍ മോഷ്ടിച്ചത്. ചക്കുവളളിയിലെ ആക്രിക്കടയില്‍ പ്രതികളെ എത്തിച്ചു നടത്തിയ തെളിവെടുപ്പില്‍ രണ്ടു ബാറ്ററികളും കണ്ടെടുത്തു.
പ്രതികള്‍ സമാനമായ രീതിയില്‍ ശൂരനാട്, അടൂര്‍ സ്റ്റേഷന്‍ പരിധിയില്‍ മോഷണം നടത്തിയതായി പൊലീസിന് സംശമുണ്ട്. സിസിടിവി ഇല്ലാത്ത സ്ഥലങ്ങളില്‍ പാര്‍ക്ക് ചെയ്ത വാഹനങ്ങള്‍ കേന്ദ്രീകരിച്ചാണ് ഇവര്‍ മോഷണം നടത്തുന്നത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. നൂറനാട് സി ഐ ശ്രീകുമാറിന്റെ നേതൃത്വത്തില്‍ എസ് ഐ നിതീഷ്, എസ് സി പിഒമാരായ രജീഷ്, രാധാകൃഷ്ണന്‍ ആചാരി, ശരത്ത്, സിജു, സുന്ദരേശന്‍, സി പി ഒമാരായ കലേഷ്, മനു, വിഷ്ണു, ഷമീര്‍ എന്നിവരാണ് പ്രതികളെ പിടികൂടിയത്.