കരുനാഗപ്പള്ളി: ക്ഷേത്രത്തിനുള്ളില്‍ അതിക്രമിച്ച് കയറി മോഷണം നടത്തിയ പ്രതി പോലീസിന്റെ പിടിയിലായി. ശൂരനാട് തെക്ക് കിടങ്ങയം നടുവില്‍ മാരൂര്‍ ചിറയില്‍ വീട്ടില്‍ ആരോമല്‍ എന്ന ത്രിജിത്ത് (19) ആണ് കരുനാഗപ്പള്ളി പോലീസിന്റെ പിടിയിലായത്. ജൂലൈ 30ന് പുലര്‍ച്ചെ തൊടിയൂര്‍ അമ്പിരേത്ത് ദുര്‍ഗാ ദേവി ക്ഷേത്രത്തിനുള്ളില്‍ അതിക്രമിച്ച് കയറിയ പ്രതി തിടപ്പള്ളിയില്‍ പൂട്ടി സൂക്ഷിച്ചിരുന്ന 5 ഓട്ട് ഉരുളികളും 6 നിലവിളക്കുകളും 12000 രൂപയും മോഷ്ടിച്ചെടുക്കുകയായിരുന്നു.
മോഷണവിവരം മനസ്സിലാക്കി അടുത്ത ദിവസം തന്നെ ക്ഷേത്രഭാരവാഹികള്‍ കരുനാഗപ്പള്ളി പോലീസ് സ്റ്റേഷനില്‍ പരാതി നല്‍കുകയും ചെയ്തു. സിസിടിവി ദൃശ്യങ്ങളും മറ്റ് തെളിവുകളും ശേഖരിച്ച് പോലീസ് സംഘം അന്വേഷണം നടത്തിയെങ്കിലും മോഷ്ടാവിനെ കണ്ടെത്താന്‍ കഴിഞ്ഞിരുന്നില്ല. തുടര്‍ന്ന് മോഷണംപോയ ഓട്ട് പാത്രങ്ങള്‍ കേന്ദീകരിച്ച് നടത്തിയ അന്വേഷണത്തില്‍ ശൂരനാടുള്ള ആക്രികടയില്‍ ഇവ വില്‍പ്പന നടത്തിയിട്ടുള്ളതായ് കണ്ടെത്തുകയായിരുന്നു.
ആക്രികട ഉടമയില്‍ നിന്നും വിവരങ്ങള്‍ ശേഖരിച്ച പോലീസ് സംഘം പ്രതിയായ ത്രിജിത്തിനെ കസ്റ്റഡിയില്‍ എടുത്ത ശേഷം തെളിവുകളുടെ അടിസ്ഥാനത്തില്‍ നടത്തിയ ചോദ്യം ചെയ്യലില്‍ പ്രതി കുറ്റം സമ്മതിക്കുകയായിരുന്നു.