കരുനാഗപ്പള്ളി: കരുനാഗപ്പള്ളി താലൂക്ക് എന്‍എസ്എസ് കരയോഗ യൂണിയന്റെ 84-ാമത് വാര്‍ഷിക ബഡ്ജറ്റ് പൊതുയോഗം സംഘടിപ്പിച്ചു. എന്‍എസ്എസ് ട്രഷറര്‍ അഡ്വ. എന്‍.വി. അയ്യപ്പന്‍ പിള്ള അധ്യക്ഷനായി. 2023-24 സാമ്പത്തിക വര്‍ഷത്തെ പ്രവര്‍ത്തന റിപ്പോര്‍ട്ടും വരവ്-ചെലവ് കണക്കും സപ്ലിമെന്ററി ബഡ്ജറ്റും മുതല്‍കടം സ്റ്റേറ്റ്മെന്റും 2024-25 വര്‍ഷത്തേക്കുള്ള ബജറ്റും യൂണിയന് സെക്രട്ടറി അരുണ്‍ ജി. നായര്‍ അവതരിപ്പിച്ചു. യൂണിയന് വൈസ് പ്രസിഡന്റ് അഡ്വ. വി. ഉണ്ണിക്കൃഷ്ണ പിള്ള, ഇന്‍സ്പെക്ടര്‍ വി. ഹരികൃഷ്ണന്‍ തുടങ്ങിയവര്‍ സംസാരിച്ചു.
7 കോടി 9 ലക്ഷം രൂപയുടെ ബഡ്ജറ്റ് ആണ് അവതരിപ്പിച്ചിരിക്കുന്നത്. സാമൂഹ്യക്ഷേമ പദ്ധതി പ്രകാരം സാമ്പത്തികമായി പിന്നോക്കം നില്‍ക്കുന്ന കരയോഗങ്ങള്‍ക്ക് വിവാഹം, ചികിത്സാ ധനസഹായം എന്നിവ നല്‍കുന്നതിന് 2 ലക്ഷം രൂപ വീതവും ഹ്യൂമന്‍ റീസോഴ്സ് സെന്റര്‍ പ്രവര്‍ത്തനങ്ങള്‍ക്ക് 2 ലക്ഷം രൂപ, എന്‍ഡോവ്മെന്റ് സ്‌കോളര്‍ഷിപ്പ്, സാമ്പത്തികമായി പിന്നോക്കം നില്‍ക്കുന്ന കുട്ടികള്‍ക്കുള്ള ധനസഹായം, പ്രതിഭകളെ ആദരിക്കല്‍ എന്നിവയ്ക്ക് 20 ലക്ഷം രൂപ, ദുരിതാശ്വാസ നിധി സംഭാവന ഇനത്തില്‍ 3 ലക്ഷം രൂപ, മന്ദിര നിര്‍മാണത്തിനായി 4 കോടി രൂപ, അധ്യാന്മിക പഠന കേന്ദ്രങ്ങളുടെ പ്രവര്‍ത്തനങ്ങള്‍ക്ക് 3 ലക്ഷം രൂപ, സര്‍വീസ് ദ്വൈവാരികയ്ക്ക് 5 ലക്ഷം രൂപ എന്നിവ ബജറ്റില്‍ ഉള്‍പ്പെടുത്തിയിട്ടുണ്ട്.