പരവൂര്‍: റോഡിന് കുറുകെ കടപുഴകി വീണ മരത്തിലിടിച്ച് യുവാവിന് ദാരുണാന്ത്യം. പൂതക്കുളം വയലില്‍ക്കര പുത്തന്‍ വീട്ടില്‍ സുരേന്ദ്രന്‍പിള്ള-ബിന്ദു ദമ്പതികളുടെ മകന്‍ സോനു (22) ആണ് മരിച്ചത്. പരവൂര്‍-പാരിപ്പള്ളി റോഡില്‍ പുത്തന്‍കുളം അമ്മാരത്തു മുക്കിലാണ് സംഭവം. വെള്ളിയാഴ്ച രാത്രി 10ന് സോനുവും സുഹൃത്തായ സുജിത്തും കൂടി ഇരുചക്ര വാഹനത്തില്‍ ജോലിക്കുപോയി തിരികെ വരുമ്പോഴാണ് അപകടം ഉണ്ടായത്.
കഴിഞ്ഞ ദിവസം പെയ്ത മഴയിലും ശക്തമായ കാറ്റിലും ചുവട് ദ്രവിച്ചു നിന്ന പാഴ്മരം കടപുഴകി വീഴുകയായിരുന്നു. ഇതറിയാതെ വന്ന സോനുവും സുഹൃത്തും മരത്തിലേക്ക് ഇടിച്ച് കയറുകയായിരുന്നു. സോനു സംഭവ സ്ഥലത്തു തന്നെ മരിച്ചു.
സുഹൃത്ത് ഗുരുതരാവസ്ഥയില്‍ തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. പരവൂര്‍ പൊലീസ് കേസെടുത്തു. മൃതദേഹം പാരിപ്പള്ളി മെഡിക്കല്‍ കോളേജില്‍ പോസ്റ്റ്മാര്‍ട്ടത്തിന് ശേഷം ബന്ധുക്കള്‍ക്ക് വിട്ട് കൊടുത്തു. സോനുവിന്റെ സഹോദരന്‍ സുജിത്ത്.
