കൊട്ടാരക്കര: കൊല്ലം റവന്യു ജില്ലാ കായിക മത്സരങ്ങള്‍ക്ക് ഇന്ന് തുടക്കമാവും. ഇന്ന് മുതല്‍ 19 വരെ കൊട്ടാരക്കര ഗവ.വിഎച്ച്എസ്എസ് സ്‌കൂള്‍ ഗ്രൗണ്ട്, എസ്‌കെവി വിഎച്ച്എസ്എസ് തൃക്കണ്ണമംഗല്‍ സ്‌കൂള്‍ ഗ്രൗണ്ട് എന്നീ വേദികള്‍ കേന്ദ്രീകരിച്ചാണ് മത്സരങ്ങള്‍ നടക്കുക. ഇന്ന് രാവിലെ 9.30ന് ബിഎച്ച്എസ് ഗ്രൗണ്ടില്‍ കായികമേളയുടെ ഉദ്ഘാടനം ധനകാര്യ മന്ത്രി കെ.എന്‍. ബാലഗോപാല്‍ നിര്‍വഹിക്കും. മുന്‍സിപ്പല്‍ ചെയര്‍മാന്‍ എസ്.ആര്‍ രമേശ് അധ്യക്ഷത വഹിക്കും. 19ന് സമാപന സമ്മേളനം കൊല്ലം ജില്ലാ പഞ്ചായത്ത് പ്രസിഡന്റ് ഡോ.പി.കെ. ഗോപന്‍ ഉദ്ഘാടനം ചെയ്യും.
12 ഉപജില്ലകളില്‍ നിന്നും ഒന്നും രണ്ടും മൂന്നും സ്ഥാനങ്ങള്‍ നേടിയ വിദ്യാര്‍ത്ഥികള്‍ 96 ഇനങ്ങളിലായി മാറ്റുരയ്ക്കും. സബ് ജൂനിയര്‍, ജൂനിയര്‍ സീനിയര്‍ വിഭാഗങ്ങളില്‍ 2300 വിദ്യാര്‍ഥികള്‍ പങ്കെടുക്കുന്നുണ്ട്. ആകെയുള്ള 96 വിഭാഗം മത്സരങ്ങളില്‍ ത്രോ ആന്റ് ലോങ് ജമ്പ് ഇനത്തില്‍പ്പെട്ട മത്സരങ്ങള്‍ എസ്‌കെവിവിഎച്ച്എസ്എസ് തൃക്കണ്ണമംഗല്‍ സ്‌കൂള്‍ ഗ്രൗണ്ടിലും, ബാക്കി മത്സരങ്ങളെല്ലാം ഗവ.വിഎച്ച്എസ്എസ് കൊട്ടാരക്കര സ്‌കൂള്‍ ഗ്രൗണ്ടിലുമായിയാണ് നടക്കുക.
