ചവറ: നീണ്ടകര താലൂക്ക് ആശുപത്രിയില്‍ കൂട്ടിരിപ്പുകാരിയായി എത്തിയ സ്ത്രീയുടെ മൊബൈല്‍ ഫോണും 3500 രൂപയും മോഷ്ടിച്ച യുവാവ് പോലീസിന്റെ പിടിയിലായി. ചവറകുളങ്ങര ഭാഗം പാലത്തറതെക്കതില്‍ ഇര്‍ഷാദ്(24) ആണ് ചവറ പോലീസിന്റെ പിടിയിലായത്.
കഴിഞ്ഞ ബുധനാഴ്ച നീണ്ടകര താലൂക്ക് ആശുപത്രിയില്‍ ചികിത്സയില്‍ കഴിഞ്ഞ് വന്ന ഭര്‍ത്താവിന് കൂട്ടിരിപ്പിനായി എത്തിയ മൈനാഗപ്പള്ളി സ്വദേശിനിയായ സ്ത്രീയുടെ കൈയില്‍ നിന്ന് ഇയാള്‍ മൊബൈല്‍ഫോണും പണവും പിടിച്ചു പറിച്ച് എടുത്ത ശേഷം ഓടിരക്ഷപ്പെടുകയായിരുന്നു.
ചവറ പോലീസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ നടത്തിയ അന്വേഷണത്തില്‍ ഇയാളെ ശനിയാഴ്ച ചവറ ബസ് സ്റ്റാന്‍ഡിന് സമീപത്തു നിന്ന് പിടികൂടുകയായിരുന്നു.
പോലീസ് നടത്തിയ പരിശോധനയില്‍ ഇയാളുടെ പക്കല്‍ ഉണ്ടായിരുന്ന മോട്ടോര്‍ബൈക്കും എറണാകുളം നോര്‍ത്ത്‌റെയില്‍വേസ്റ്റേഷനില്‍ നിന്ന് മോഷ്ടിച്ചതാണെന്ന് കണ്ടെത്തിയിട്ടുണ്ട്. കായംകുളം സ്വദേശിയുടെ ബൈക്കാണ് ഇയാള്‍ മോഷ്ടിച്ചത്. സമാനമായ കുറ്റകൃത്യങ്ങളില്‍ ഏര്‍പ്പെട്ടതിന് ഇയാള്‍ക്കെതിരെ മുമ്പും നിരവധി കേസുകള്‍ രജിസ്റ്റര്‍ ചെയ്യ്തിട്ടുണ്ട്.
ചവറ പോലീസ് ഇന്‍സ്‌പെക്ടര്‍ കെ.ആര് ബിജുവിന്റെ നേതൃത്വത്തില്‍ എസ്‌സിപിഒ രഞ്ജിത്ത് രാജന്‍, സിപിഒമാരായ മനീഷ്, മനോജ്, സജിത്ത് എന്നിവരടങ്ങിയ പോലീസ് സംഘമാണ് ഇയാളെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡു ചെയ്തു.
