ഓയൂര്‍: ചെറിയ വെളിനല്ലൂര്‍, റോഡുവിളയില്‍ ഗൃഹനാഥന്‍ തീ കൊളുത്തി മരിച്ച സംഭവത്തില്‍ പൊള്ളലേറ്റ് ആശുപത്രിയില്‍ ചികിത്സയിലായിരുന്ന രണ്ടു മക്കളില്‍ അവശേഷിച്ച പെണ്‍കുട്ടിയും മരിച്ചു. കൃഷ്ണവിലാസത്തില്‍ വിനോദ് കുമാറിന്റെ മകള്‍ വിസ്മയ (13) ആണ് ബുധനാഴ്ച രാത്രി 11 മണിയോടെ മരിച്ചത്.
കഴിഞ്ഞ ശനിയാഴ്ച രാത്രിയിലാണ് വിനോദ് കുമാര്‍ ഉറങ്ങിക്കിടന്ന സമയത്ത് മക്കളുടെ ശരീരത്തില്‍ പെട്രോളൊഴിച്ച് തീവെയ്ക്കുകയും പിന്നീട് സ്വന്തം ശരീരത്തിലും പെട്രോളൊഴിച്ച് തീ കൊളുത്തുകയും ചെയ്തത്. വിനോദ് കുമാര്‍ സംഭവസ്ഥലത്ത് തന്നെ മരിച്ചിരുന്നു. പരിക്കേറ്റ മിഥുനെയും, വിസ്മയയും തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരുന്നു. ചികിത്സയിലിരിക്കെ തിങ്കളാഴ്ച രാവിലെ മിഥുന്‍ മരിച്ചിരുന്നു.
ചെറിയ വെളിനല്ലൂര്‍ റോഡുവിള ഹയര്‍ സെക്കന്ററി സ്‌കൂളിലെ എട്ടാം ക്ലാസ് വിദ്യാര്‍ത്ഥിനിയാണ് വിസ്മയ. പൂയപ്പള്ളി പോലീസ് ഇന്‍ക്വസ്റ്റ് തയ്യാറാക്കി. പോസ്റ്റ് മോര്‍ട്ടത്തിന് ശേഷം വിസ്മയയുടെ മൃതദേഹം ബന്ധുക്കള്‍ക്ക് വിട്ടു നല്‍കി.
വിനോദിന്റെ ഭാര്യ സിനി കുമാരി രോഗബാധിതയായി എട്ട്മാസം മുന്‍പ് മരണപ്പെട്ടിരുന്നു. ആഴ്ചകള്‍ക്കകം പിതാവും മരിച്ചതോടെ വിനോദ് മാനസിക സംഘര്‍ഷത്തിലാവുകയും ചെയ്തു. രോഗബാധിതനായതോടെ തനിക്ക് എന്തെങ്കിലും സംഭവിച്ചാല്‍ കുട്ടികളുടെ ഭാവി എങ്ങനെയാകുമെന്ന മനോവിഷമത്തിലാണ് ഇദ്ദേഹം മക്കളെ കൊന്നശേഷം സ്വയം ജീവനൊടുക്കുക എന്ന തീരുമാനത്തിലേക്ക് എത്തിയതെന്ന് സംശയിക്കുന്നതായി ബന്ധുക്കള്‍ പറയുന്നു.
