ശാസ്താംകോട്ട:പോരുവഴി പരവട്ടത്ത് അടഞ്ഞു കിടക്കുന്ന കശുവണ്ടി ഫാക്ടറിയിൽ മോഷണം നടത്തിയ സംഭവത്തിൽ രണ്ട് പേർ കസ്റ്റഡിയിൽ. ശൂരനാട് വടക്ക് കുന്നിരാടം സ്വദേശികളായ കുഞ്ഞുമോൻ,അനീഷ് എന്നിവരെയാണ് ശൂരനാട് പൊലീസ് കസ്റ്റഡിയിലെടുത്തത്.ചൊവ്വാഴ്ച രാത്രി എട്ടോടെയാണ് സംഭവം.ഫാക്ടറിക്ക് സമീപത്തുകൂടി യാത്ര ചെയ്തവർക്ക് ഉണ്ടായ സംശയത്തെ തുടർന്നാണ് മോഷ്ടാക്കളെ പിടികൂടാനായത്.ഫാക്ടറിക്ക് സമീപം ഇരുചക്രവാഹനം പാർക്ക് ചെയ്തിരിക്കുന്നത് കണ്ടെത്തിയ പരിസരവാസികൾ നോക്കുമ്പോൾ ഫാക്ടറിക്കുള്ളിൽ മോഷണം നടക്കുകയായിരുന്നു.
തുടർന്ന് മോഷ്ടാക്കളെ തടഞ്ഞുവച്ച് പൊലീസിൽ വിവരം അറിയിച്ചു.ഇതിനിടയിൽ ഒരാൾ ഓടി രക്ഷപ്പെട്ടു.രണ്ടംഗ സംഘത്തിലെ അനീഷാണ് ഇരുട്ടിൻ്റെ മറവിൽ ഓടി മറഞ്ഞത്.ശൂരനാട് പൊലീസ് എത്തി കുഞ്ഞുമോനെ കസ്റ്റഡിയിലെടുക്കുമ്പോൾ സംഭവം അറിഞ്ഞെത്തിയ നാട്ടുകാരനെ പോലെ നാട്ടുകാരുടെ കണ്ണ് വെട്ടിച്ച് ഓടി മറഞ്ഞ അനീഷ് അവിടേക്ക് എത്തുകയായിരുന്നു.സംശയം തോന്നി ചോദ്യം ചെയ്തപ്പോൾ ഇയ്യാൾ കുറ്റം സമ്മതിക്കുകയായിരുന്നു.പരവട്ടത്തെ ഫാക്ടറിയിലും പരിസരത്തും അടുത്തിടെ മോഷണം വ്യാപകമായിരുന്നു.ഇരുചക്ര വാഹനങ്ങളിലെ ബാറ്ററികൾ,കിണറുകളിലെ മോട്ടർ അടക്കമുള്ളവ മോഷണം പോകുന്നത് പതിവായിരുന്നു.
