കുന്നത്തൂർ:കുന്നത്തൂർ ഐവർകാല പുത്തനമ്പലം ദേവീക്ഷേത്ര മൈതാനിയിലെ മെറ്റൽ കൂനകൾ പ്രദേശവാസികൾക്ക് വിനയാകുന്നു.ക്ഷേത്രത്തിന് എതിർവശം യു.പി സ്കൂളിനോട് ചേർന്നുള്ള മൈതാനമാണ് മെറ്റൽകൂനകൾ കൊണ്ട് നിറഞ്ഞിരിക്കുന്നത്.ലോറികളിൽ എത്തിച്ചാണ് ആഴ്ചകൾക്ക് മുമ്പ് മെറ്റൽ ഇറക്കിയത്.തകർന്നു കിടക്കുന്ന റോഡ് നിർമ്മാണത്തിന് വേണ്ടിയാണ് മെറ്റൽ എത്തിച്ചതെന്നാണ് നാട്ടുകാർ കരുതിയിരുന്നത്.ഇത് സംബന്ധിച്ച് സ്ഥിതികരണമില്ല.ജനപ്രതിനിധികളോടും പഞ്ചായത്ത് സെക്രട്ടറിയോടും അന്വേഷിച്ചപ്പോൾ ആരാണ് മെറ്റൽ ഇറക്കിയതെന്നോ എന്തിനെന്ന് ആണന്നോ അറിയില്ലെന്ന മറുപടിയാണ് ലഭിച്ചതെന്ന് നാട്ടുകാർ പറയുന്നു.മെറ്റൽ കൂനകൾ കാരണം സ്കൂളിലേക്ക് കുട്ടികൾക്ക് എത്തുന്നതിനും തടസമായിട്ടുണ്ട്.വിശേഷ ദിവസങ്ങളിൽ
ക്ഷേത്ര മൈതാനത്ത് വിളക്കുകൾ തെളിക്കാനും കഴിയുന്നില്ല.അടുത്ത മാസം ആദ്യം നടക്കുന്ന ക്ഷേത്രത്തിലെ ഉത്സവത്തിനുള്ള ഒരുക്കങ്ങൾക്കും മെറ്റൽകൂനകൾ പ്രശ്നമായിട്ടുണ്ട്.അടിയന്തിരമായി മെറ്റൽ നീക്കം ചെയ്യണമെന്നും അല്ലാത്തപക്ഷം നിയമപരമായ കാര്യങ്ങളിലേക്ക് കടക്കുമെന്നും ക്ഷേത്രം ഭാരവാഹികളായ റ്റി.എ സുരേഷ് കുമാർ, ഐവർകാല രാജശേഖരൻ പിള്ള എന്നിവർ അറിയിച്ചു.
