കരുനാഗപ്പള്ളി. മലയാളത്തിന്റെ പ്രിയപ്പെട്ട കഥാകാരന് അദ്ദേഹത്തിൻ്റെ കൃതികൾ വായിച്ചുകൊണ്ട് വേറിട്ട അനുസ്മരണം ഒരുക്കി കരുനാഗപ്പള്ളി താലൂക്ക് ലൈബ്രറി കൗൺസിൽ. ലാലാജി ഗ്രന്ഥശാല ഹാളിൽ നടന്ന എം ടി അനുസ്മരണ ചടങ്ങ് അദ്ദേഹത്തിൻ്റെ രചനകളുടെ അവതരണം കൊണ്ട് വേറിട്ടതായി. രണ്ടാമൂഴം, മഞ്ഞ്, വാരണാസി, വാരിക്കുഴി, അസുരവിത്ത്, നാലുകെട്ട് തുടങ്ങിയ എം ടി കൃതികളുടെ പ്രസക്തഭാഗങ്ങൾ അവതരിപ്പിച്ചു കൊണ്ടാണ് അനുസ്മരണം സംഘടിപ്പിച്ചത്. താലൂക്ക് ലൈബ്രറി കൗൺസിൽ സെക്രട്ടറി വി വിജയകുമാർ ആമുഖപ്രഭാഷണം നടത്തി.
താലൂക്ക് എക്സിക്യൂട്ടീവ് അംഗം സുരേഷ് വെട്ടുകാട് അധ്യക്ഷനായി. ജില്ലാ ലൈബ്രറി കൗൺസിൽ എക്സിക്യൂട്ടീവ് അംഗം വി പി ജയപ്രകാശ് മേനോൻ, ജെ ആർ മീര, വിമൽ റോയ്, എസ് ജി ഗംഗ, രമ്യാലക്ഷ്മി, സുമൻജിത്ത് മിഷ എന്നിവർ വിവിധ കൃതികളുടെ അവതരണം നടത്തി. ആർ രവീന്ദ്രൻപിള്ള അവതരണങ്ങൾ ക്രോഡീകരിച്ചു. തുടർന്ന് ദീപങ്ങൾ തെളിച്ച് എം ടി തയ്യാറാക്കിയ ഭാഷാ പ്രതിജ്ഞ ചൊല്ലിക്കൊണ്ടാണ് ചടങ്ങുകൾ അവസാനിച്ചത്. ലൈബ്രറി കൗൺസിൽ നേതൃസമിതി കൺവീനർ എ സജീവ് കൃതജ്ഞത രേഖപ്പെടുത്തി.
