ശാസ്താംകോട്ട:ചക്കുവള്ളി അരീക്കൽ കലുങ്കിനു സമീപം പുതുവത്സരരാത്രിയിൽ ബൈക്ക് വീടിൻ്റെ മതിലിൽ ഇടിച്ചു കയറി യുവാവ് മരിച്ചു.ശൂരനാട് വടക്ക് പടിഞ്ഞാറ്റം കിഴക്ക് 12 -ാം വാർഡ് കാഞ്ഞിരക്കാട്ട് തറയിൽ (അഭിജിത്ത് ഭവനം) അഭിജിത്ത് (21) ആണ് മരിച്ചത്.കൂടെ ഉണ്ടായിരുന്ന ശൂരനാട് വടക്ക് പാറക്കടവ് സ്വദേശി അജിത്തിനാണ് ഗുരുതരമായി പരിക്കേറ്റത്.ഇയ്യാളെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.ചൊവ്വാഴ്ച രാത്രി 12 ഓടെ കൊല്ലം-തേനി ദേശീയപാതയിൽ ചക്കുവള്ളിക്ക് സമീപം ഇയ്യാനം അരീക്കൽ കലുങ്കിനു സമീപത്താണ് അപകടം സംഭവിച്ചത്.ഇരുവരും സഞ്ചരിച്ചിരുന്ന ബൈക്ക് വീടിന്റെ ഗേറ്റിലേക്ക് ഇടിച്ചു കയറുകയായിരുന്നു.ഇടിയുടെ ആഘാതത്തിൽ ഗേറ്റും മതിലും അകത്തുണ്ടായിരുന്ന പൂച്ചട്ടികളും തകർന്നു.ബൈക്കിനും കേടുപാടുകൾ സംഭവിച്ചു.എന്നാൽ മറ്റൊരു വാഹനം ഇടിച്ചതിനെ തുടർന്നാണ് യുവാക്കൾ അപകടത്തിൽപ്പെട്ടത് എന്നാണ് പറയപ്പെടുന്നത്.ഈ വാഹനം കണ്ടെത്താനായിട്ടില്ല.വാഹനം കണ്ടെത്താൻ ശൂരനാട് പോലീസിന്റെ നേതൃത്വത്തിൽ സിസിടിവി ദൃശ്യങ്ങൾ കേന്ദ്രീകരിച്ച് പരിശോധന ആരംഭിച്ചു.അപകടത്തിൽപ്പെട്ട യുവാക്കളെ ശൂരനാട് പോലീസിന്റെ വാഹനത്തിൽ ശാസ്താംകോട്ട താലൂക്ക് ആശുപത്രിയിലും തുടർന്ന് അഭിജിത്തിനെ തിരുവനന്തപുരം മെഡിക്കൽ കോളേജിലും പ്രവേശിപ്പിച്ചു.ചികിത്സയിലിരിക്കെ ഇന്ന് ഉച്ചയോടെ അഭിജിത്ത് മരണപ്പെടുകയായിരുന്നു.
