ശാസ്താംകോട്ട: ശൂരനാട് വടക്ക് ആനയടി പഴയിടം ശ്രീനരസിംഹസ്വാമി ക്ഷേത്രത്തിലെ തിരുവുത്സവവും ചരിത്ര പ്രസിദ്ധമായ ആനയടി ഗജമേളയും ചൊവ്വാഴ്ച്ച നടക്കും.കൊല്ലം,ആലപ്പുഴ,പത്തനംതിട്ട ജില്ലകളിൽ നിന്നും ഒഴുകിയെത്തുന്ന പുരുഷാരത്തിനൊപ്പം ക്ഷേത്രത്തിൻ്റെ തെക്കുഭാഗത്ത് മകരക്കൊയ്ത്ത് കഴിഞ്ഞ വയലേയിൽ നെറ്റിപ്പട്ടവും വെഞ്ചാമരവും മുത്തുക്കുടയും ചാർത്തി ഗജവീരന്മാർ അണിനിരക്കും.വൈകിട്ട് 5ന് നടക്കുന്ന ഗജമേളയിൽ 60 ഓളം കരിവീരന്മാരാണ് അണിനിരക്കുന്നത്.
തെങ്ങമം ജയവിജയന്മാരും അജിത്ത് കൽഹാരവും 40ൽപ്പരം വാദ്യകലാകാരന്മാരും അവതരിപ്പിക്കുന്ന പാണ്ടിമേളം ഗജമേളയിൽ പെയ്തിറിങ്ങും.രാവിലെ 5 മുതൽ ക്ഷേത്രാചാര ചടങ്ങുകൾ,3ന് ദേവൻ്റെ ഗ്രാമ പ്രദക്ഷിണവും കെട്ടുകാഴ്ച മഹോത്സവവും,രാത്രി 7.30 ന് തൃക്കൊടിയിറക്ക്,രാത്രി 8 ന് നാഗസ്വരക്കച്ചേരി,9.45 ന് ആറാട്ടുവരവ്,സേവ, 10 ന് പഞ്ചാരിമേളം,പുലർച്ചെ 1 ന് മൂവി സ്റ്റേജ് ഡ്രാമ-രൗദ്രമുഖി എന്നിവ നടക്കും
